Myanmar sipai sorkar chuan anmahni eptute hmeh mih nan thi tura tih an uar a, February, 2021-a thuneihna an chan leh atangin mi 130 chuang thi turin an chungthu a rel tawh tih United Nations thuneitu sangin a sawi.

UN High Commissioner for Human Rights Volker Turk chuan Zirtawpni khan university zirlai pasarih vel chu Nilainia mi dang hriat lohva an chungthu relnaah thi tura tih an nih thu a sawi a, Ningani khan thalai pali chu thi turin an ti bawk tih a sawi.

Turk chuan tihhlum tura tihte hi thulh vek ni se a duh thu a sawi a, Myanmar-a sipai hotute hian death penalty hi intihchaka anmahni eptute hmeh mih nan an hmang niin a sawi.

“Sipaite hian kalphung pangngaia dik taka court rorelna dan bawhchhiain a rukin thu an rem thin chu an la chhunzawm zel a ni,” tiin thu a chhuah.

UN chief chuan sipaite hian an chhehvel ram leh khawvel ram dangten muanna a awm theih nana hma a lakna chu hmusitin ‘thi tura mi tih hi politics hmanruaa hmangin eptute neksawr nan an hmang’ tih a sawi.

Tar lam tawh thin angin February 1, 2021-a sipaiten mipui thlan sorkar paih thlaa  thuneihna an chan leh hnuah khan an ram mipuite chuan nasa takin duh lohna an lantir a. Hei hi sipaite chuan tharum nen an chhang let a, thi leh hliam pawh an tam tawh hle.

Tunah chuan sipai roreltute dodalna hi helnaa inletin thingtlang kilkhawr lamah phei chuan sipai duh lotute leh sipaite hi an inbei nasa hle.

Zirlaite thi tura hremna leh thihna

Myanmar-a khawpui lian ber, Yangon-a Dagon University-a Students’ Union chuan Ningani khan an university-a zirlai pasarih vel, kum 18 leh 24 inkar, April 21-a mante chu Nilaini khan Yangon-a Insein tan ina sipai court-in thi tura hremna a tihchhuah thu an puang.

Dagon University Students’ Union-a executive member pakhat chuan The Associated Press hnenah zirlai pasarihte hi sipai rorelna dodala khawpuia ralthuam tawlh veltua puh an nih thu a sawi a, April thlaa bank branch manager kah hlumnaa inhnamhnawih nia puh an ni bawk tih a sawi.

Aung San Suu Kyi-i sorkar paih thlak a nih hnuah sipaite hian mi 2,000 chuang an that tawh niin sipaite ep tura mipui sorkar dina hotu, Duwa Lashi La chuan a sawi.

National Unity Government (NUG)-a president nihna chelh mektu, Duwa Lashi La hian Ningani khan Reuters hnenah thi zat hi chhinchhiah zat aia tam daih an nih tawh tur thu a sawi tel.

July thla khan sipaite hian political activist pali an khai hlum a, hei hi kum 30 vel chhunga mi tihhlum an nih vawi khatna a ni.

He thil hi khawthlang ram leh Association of Southeast Asian Nations (ASEAN) chuan na takin an dem.

Khawthlang ramte hian NUG an thlawp thu sawiin sipai commander leh company tam tak hrekin sipaite an puihna thin a titawp bawk.