Aizawl April 24, 2024 : Mizo Zirlai Pawl (MZP) General Headquarters, Aizawl Executive Committee meeting vawi 630-na chu vawiin ckhan MZP Conference Hall-ah an thukhawm a, Champhai District-a an zirlaipui vawi tam tak pawngsual a ni chu lungchhiatthlak an ti. Pawi khawihtu nia puh te chu an phu ang tawk hremna pe turin thuneitute an ngen.

Meeting chuan, Chanchinthara lo lang Champhai District-a an zirlaipui vawi tam tak pawngsual a ni chu lungchhiatthlak an ti. Pawi khawihtu nia puh - Saitawna leh a fapa Vanlalmawia te chu an phu ang tawk hremna pe turin thuneitute an ngen nghal. Hetiang thil duhawm lo tak hun rei tak chhung hriatchhuah loh, hai chhuaktu an zirtirtunu chu MZP chuan an chhuang a. Hetiang thil hi thleng nawn tawh lo se MZP chuan am duh a ni. 

Meeting-ah hian Assembly 2024 thlenna tur leh Federal Council Sitting rorel bawhzui dan tur bakah pawl chhung thil pawimawh te rel a ni. Meeting hi MZP President H Lalthianghlima'n a kaihruai. MZP inkhawmpui lian Assembly 2024 thlen dilna lut te a ngaihtuah a, 2024 MZP Assembly thleng turin MZP Headquarters Champhai hnuaia mi MZP Branch Tlangsam an thlang a ni.

Meeting chuan, MZP Federal Council Sitting-in a lo rel tawh hrang hrangte bawhzui dan tur ngaihtuahin, ruahmanna a siam a. Rorel thenkhatte chu a zirchiangtu tur Study Group dinin, chak taka bawhzui nise a ti a ni. Chungte chu:-

1) Sairang thlenga rel a lo luh thuai dawn avangin, Sawrkar in Inner Line Permit (ILP) check dan turah ruahmanna felfai zawk a siam theih nan, MZP in hma la rawh se.

2) Mizoram Education Department bik enkawl tu tur Mizoram Education Service (MES) kan neih ngei theih nan, MZP in chak zawkin hma la rawh se.

3) Mizo Zirlaite ruihhlo laka kan fihlim theih nan MZP in hma la rawh se.

4) Ram pum huapin ‘Career Awareness’ neih a nih theih nan MZP in hma la rawh se.

5) Mizoram zirnain hma a sawn theih nan, tuna hman mek kan syllabus hi zirchiana, a tul anga hmalak ni rawh se.

6) Zofate sumdawnna leh inchimralna kawng a kan him tlan theih nan, MZP hian zirchianna leh inhrilhhriatna (Awareness Campaign) nei se, a tul anga hmalak ni rawh se.

7) Mizoram ‘Schedule Tribe’ list ennawn a nih theih nan chak taka hmalak ni rawh se.