Aizawl March 17, 2021 : "MZP hi zirlai pawl kan ni a. Chutihrualin, hnam inphumkhatna kan neihna tura theihtawp chhuah ṭhin kan ni a. Inunauna kan tih hi sawi mai nilo a, a taka kalpui turin Mizoram sawrkar kan chah duh a. Tunah hian inunauna a taka kan lantir a hun tawh takzet a ni." MZP President B. Vanlaltana chuan a ti.

February ni 16 Zan dar khan MZP General Headquarters leh NGO United for Democratic Myanmar chuan Myanmar buaina avanga nunna chante sunna hun Vanapa Hall kawtah an hmang. He huna thusawitu MZP President B. Vanlaltana chuan, "Myanmar-a Democracy tun din duha hmalatute chunga nasa taka buaina leh harsatna a thleng leh nunna chan hial an awm hi MZP chuan kan dem tak zet a. Zanina helai hmuna lusun te tuarpui a sunna hun hman a ngai ta hi lungchhiatthlak kan ti a. MZP hi zirlai pawl kan ni a. Chutihrualin, hnam inphumkhatna kan neihna tura theihtawp chhuah ṭhin kan ni a. Inunauna kan tih hi sawi mai nilo a, a taka kalpui turin Mizoram sawrkar kan chah duh a. Tunah hian inunauna a taka kan lantir a hun tawh takzet a ni." a ti a.

MZP President chuan,"Zofate hi Myanmar-ah te, Bangladesh-ah te, India ramah te awmin, kan duh vang reng nilo a ṭhendarh kan ni a. Kan awmna hrang mahse thisena unau kan nih avangin kan inhmangaiha, chu kan inhmangaihna kan lantir hun chu mangan, harsatna kan tawh hun hi a ni tih hi MZP ngaihdan a ni." a ti a.

B. Vanlaltana chuan,"Mizo danah  manganga Lal sutpui vuantute beidawng a chhuahtir anni ngai lo a. Vawiina kan unau manganga Mizoram lo lutte hi kan sorkar pawhin a ṭul anga a buaipui a hun tawh takzet a. Kan unaute kan ṭanpui theilo anih chuan Mizo inti tlak pawh kan ni lo ang. Myanmar kan unau manganga awm mek ten an duh ber Democracy tun din anih theih nana an hmalak mekna hi a hlawhtlina, buaina leh harsatna lak aṭanga kan unaute him nan vawikhat tal ṭawngṭai turin Mizo mipuite ka sawm che u a ni." a ti bawk.

Myanmar buaina vanga nunna chante sunna hi Lalnunmawia Pautu, General Secretary MZP chuan buaipuiin, kalkhawmten bati chhiin Minute khat chhung ngawi renga dingin he hun hi urhsun taka hman a ni bawk.