ZALEN December 15, 2023 : MZP General Headquarters chuan vawiin khan, kumin atana MZP Pisapui kharna leh MZP hruaitu hlui MLA tling tharte lawmpuina hun MZP Conference Hall-ah a hmang.

Kumin atana MZP Pisapui kharna hunah hian MZP President chuan thu sawiin, "MZP Pisapui hi khar mah ila, Zirlaite leh ram leh hnamin min mamawhna zawnah chuan engtik lai pawhin kan che reng dawn tho a. Engtik lai pawhin hawn reng theih a ni" a ti.

MZP President chuan, "MZP chu zirlai mangang, puih ngaite puitu nih zel kan tum a. Ram leh hnam leh Zirlaite innghahna tlak ni zel turin theihtawp kan chhuah a ni" tiin. MZP Hruaitu hlui MLA tling tharte a lawmpui thu leh an kal zelna turah duhsakna a hlan.

MZP chuan, MLA General Election hnuhnûng bera MZP hruaitu hlui hlawhtlinna chang tharte lawmpuina a hlan a. Thuziak leh tawlhloh puan hlan an ni. Lawmpuite aṭangin thusawi ngaihthlâk a ni bawk.

MZP hruaitu hlui, MLA tling thar lawmpuina hlante chu:-

1. Lalmuanpuia Punte, MLA. CM Adviser (Political). MZP President (1993-1995, 1996-1997).

2. Lalchhandama Ralte, MLA. Leader of Opposition (LoP). MZP President (2001-2003).

3. Lalrinsanga Ralte MLA (Ex Executive Committee Member).

MZP Pisapui hi ni 16 January, 2024 hian hawn leh a ni ang.