Aizawl: Nimin khan NESO bultumin hmarchhak State hrang hrangah ‘The Citizenship (Amendment) Bill, 2016’ duh lohna lantirtu zirlaite, sipai tha chakna hmanga dimna tel miah lo a a beih duh loh nan lungawi loh lantirna ‘Black Day’ neih a ni a. Mizoram ah pawh Mizo Zirlai Pawl(MZP) bultumin Black Day hi hman ve a ni.   MZP General Headquarters bultuma Black Day hmanna pui ber MZP Pisapui kawt tualah a kick off neih a ni a. Kick off zawh hian Aizawl khawpui hmun hrang hrangah flag dum an zar nghal a ni.   A kick off-na hun hi B. Vanlaltana, Vice President MZP-in a kaihruai a, he huna hian MZP President L. Ramdinliana Renthlei leh Ricky Lalbiakmawia NESO Finance Secretary ten thu an sawi a ni.   MZP President L. Ramdinliana Renthlei chuan, “The Citizenship (Amendment) Bill, 2016 hi Indian Parliament-a pass duh lohna dodaltu zirlaite chunga police chet dan avanga NESO bultuma North East puma Black Day hman a ngai ta hi pawi ka ti hle a. Kan zirlaipui state danga police avanga hliam tuarte hi MZP chuan kan tawrhpui hle a, hetiang hi thleng nawn tawh lo se kan duh hle a ni. North East State ah pawh BJP sawrkarna state apiangah sawrkarin zirlaite a bei nasa a, zirlaite pawhin hliam an tuar nasa a ni. Mizoramah pawh Mizoram BJP hi MZP-in engtin nge kan tih ve dawn tih hi kan la ngaihtuah dawn a, Mizoramah hian BJP a awm ve kher pawh hi ngai kan ti lo mai thei a ni,” a ti a. The Citizenship (Amendment) Bill, 2016 chu pass a nih loh nan hma an la zel dawn tih a sawi bawk.