Aizawl March 12, 2024 : MZP General Headquarters, Adviser & Extended OB Meeting chu vawiin khan an thukhawm a, India Citizenship (Amendment) Rules, 2024 nimina tihchhuah chungchang leh Aizawl Municipal Coorporation (AMC) hnuaia hnalak dan diklo chungchang an rel.

MZP President H. Lalthianghlima chuan meeting hi a kaihruai a, Aizawl Municipal Coorporation (AMC) hnuaia Geologist-3 leh Urban Animal Husbandry & Veterinary Officer, Junior Engineer leh Asst Account Officer pakhat theuh lak danah dan kalha thiltih a awm ngei niin an hria a, induhsakna nena heng hna pawimawh tak hi lak ngei niin an hria a ni.

MZP chuan he hna la tur hian Dan angin Advertisment chhuah a nih loh bakah, State sawrkar phalna-in an lak hriat a ni lo a, danin a sawi angin MPSC emaw MSSSB kaltlanga lak a ni lo bawk. Chuvangin, heng hnalak dan diklo hi MZP chuan tun kar chhung (March ni 15) ral hma ngeia sut turin AMC hotute an ngen a ni.

Citizenship (Amendment) Rules 2024, nimin ni March 11, 2024 a tihchhuah chu North East Students’ Organisation (NESO)-in tunhma atanga a dodal tawh a nih avangin, North East State tinah a order copy hal tura tih angin MZP chuan Citizenship (Amendment) Rules 2024 copy chu MZP pisapui kawtah a hal a ni. Order copy halnaah hian NESO Vice Chairman Ricky Lalbiakmawia leh MZP hruaitute an tel a ni.