Aizawl September 2, 2024 : Vawiin khan Mizo Zirlai Pawl (MZP) General Headquarters chuan kum tin a lo tih thin angin, "Hnam dang Nupui/Pasal nei lo tura inzirtirna Ni” chu Aizawl khawpui chhunga school hrang hrangah insem darhin, Mizo zirlaite tan hnamdang nupui/pasal nei lo tura inzirtirna hun a hmang.

Hnamdang nupui/pasal nei lo tura inzirtirna hun hi, MZP chuan kum 2015 atang khan kum tin September ni 2-ah a hmang thin a. Aizawl khawpui chhunga school hrang hrangah hun hman niin, he hun hi zirlaite leh zirtirtu ten an hlut hle thin a ni.

Hnamdang nupui/pasal neilo tura inzirtirna niah hian, MZP hruaitute chuan School hrang hrang an tlawh kual a. Mizo zirlaite chu hnam dang nupui pasal nei lo tura fuihin, hnam dang nupui/ pasal neite dinhmun an hrilh a ni.

MZP hruaitute chuan, Mizote chu a chhehvel hnam dangte nen tehkhin chuan hnam tlemte a ni a. Hnam hi humhalh a ngai takzet a. Chimralna laka hnam humhalhna turin hnam dang nupui pasalah i nei lo ang u an ti.

MZP hruaitute chuan, "Mizo ten chimral kan hlauh loh hun hi kan ral hun tur a ni an ti a. Mizo hnam danin, Mizo hmeichhia hnam dang pasal nei chu an fate Mizo an nih theih loh dan leh Tribal ni lo pasal an neih phei chuan an fate’n tribal-te hamthatna dawn tur ang an dawn ve theih lo," tih te an sawi bawk.

MZP in a buatsaih hnamdang nupui/pasal nei lo tura inzirtirna ni hi Mizoram hmun hrang hrangah MZP bultumin neih a ni a, Mizo zirlaiten an hlut hle. MZP chuan hnamdang nupui/pasal nei lo tura inzirtirna hun tha tak siamsak tu school hrang hrang thuneitute chungah thinlung takin lawmthu a sawi tak meuh a ni.

Aizawl khawpui chhunga MZP General Headquarters hruaitute hun hmanna chu hetiang hi a ni:-

1. Govt. Mizo High School-ah - H. Lalthianghlima, President.

2. Govt. KM HSS-ah - Chinkhanmanga Thomte, General Secretary.

3. Shemford HSS-ah; C. Lalhmingsanga, AGS

4. Govt. Central HSS-ah - Zairemthanga, Treasurer.

5. Govt. JL HSS-ah - Rothanliana, Fin. Secretary.