ZALEN December 13, 2023 : Mizo Zirlai Pawl (MZP) chuan India rama NIT 31 zingami National Institute of Technology Mizoram (NIT Mizoram) chu ngaihthah a ni an ti a, Ministry of Human Resources Development-in kum 2010-a a din, October 13, 2012-a Lengpui-a a building lungphum pawh phum ni vek tawh kum 11 hnuah pawh sak puitlin a la ni lo chu ngaihsak a hlawh loh zia a tarlang chiang hle an ti.

Technical zirna in tha Mizoram-in a neih chhun hian permanent Campus luah a nih theih nan bawhzuina a beitham hlein a lang a. Chaltlanga mi in hrang hrang luah hawha khawsa an nih avangin, a chei that nan sum tam tak an seng thin a. Tul loah sum leh pai tam tak an sengral thin a ni, an ti.

He instituion-ah hian sum hmandan felfai tawklo tam tak a awmin an hre bawk a. CBI pawhin an chhui ngai hial khawpin he Institution sum hman dan hi a fello a, mimal induhsakna uchuak tak hmanga sum siam tum an awm em tih chu MZP zawhna a ni a. Enzui zel an tum a ni.

MZP chuan thil fello tam tak a awm tih a hriat avangin he zirna In hi an zirchiang a. Institution chungchanga hriat duh a neihte RTI hmangin an zawt a. RTI Act hmanga zawhna MZP-in a zawhte an chhan danah hian an lawmlo hle a. Zawhna pawh an chhang mumal thei lo hian an institution inawpna felfai loh zia a tarlangah an ngai a. Thawktute inkarah pawl leh pawl anga inepna lian tak a awm niin an hre bawk a ni.