Aizawl September 16, 2022 : Mizo Zirlai Pawl (MZP) Federal Council Sitting vawi 55-na chu vawiin September 16, 2022 khan MZP Conference Hall Aizawl-ah nei a, he hunah hian zirna kalphungin hma a sawn theihna atan te, Post Matric Scholarship-a Mizoram sawrkar tum ve tur State Matching Share (SMS) pekchhuah chungchang bakah RUSA leh NHIDCL dinhmun te an sawiho a, MZP Assembly atana rel turin an chhawpchhuak.

Federal Council Sitting chuan MZP Assembly agenda atan hian agenda tur an chhawp chhuak a, chung zingah chuan, Mizoram sawrkar enkawl zirna in kalphung hi ennnawn a, a tam thei ang ber zirnain hma a sawn theihna atan hman a nih theih nan hma lak ni se an ti a, Post Matric Scholarship-a sawrkar tum ve tur State Matching Share (SMS) hi a hun taka pekchhuah a nih theih nan hmalak ni se, tih an chhawpchhuak.

MZP chuan, Mizoram sawrkar hnuaia College hrang hrang te’n Bus an mamawh hi sawrkarin a tul anga a ngaihtuahsak theih nan hmalak ni rawh se, an ti a, RUSA kaltlanga college hrang hrang sak that/ thawmthat hi a hun taka zawh a nih theih nan hmalak ni se, tih chu an agenda tur pakhat a ni.

Mizoram chhunga NHIDCL hnuaia kawng laih hna thawh mek chu a nih dan tur dik  taka thawh a nih theih nan enfiaha hmalak an rawt a, Mizoram sawrkar hnuaia hna lakah Mizo tawng Middle School standard tih hi exam a nih theih nana hmalak leh Mizoram chhunga Insurance company ten Insurance diltute hnenah harsatna an siam thin chu chinfel a nih theih nana hmalak dan tur rel chu an agenda pakhatah an dah.

He hunah hian House Leader, MZP General Headquarters President ni bawk Lalnunmawia Pautu chuan, "MZP chuan ram leh hnam tan engtiklai pawhin theih tawp a chhuah thin a, kan ram leh hnam tana tha nia kan hriatah mi-in min support lo mah se, huaisen takin ke kan pen thin." a ti.

Lalnunmawia Pautu chuan ramri chungchang sawiin, "Mizoram leh Assam sawrkar-in inbiakna neih a tum chu tha kan tiin lawmawm kan ti a. Beiseina sang tak nen kan thlir mek a ni, chutih laiin ramri chungchangah MZP ngaihdan chu a la ngai reng a, kan pi leh pute luah chin ram BEFR 1875 hi kan ram a ni," a ti bawk.

"MZP chuan Mizo thalai hna zawng mek te hmakhua kan ngaih avangin, Pension rawihnawn hi kan remti lo a. Mi bik leh thiamna bik nei an nih loh chuan pension tawh rawihnawn tlut tlut hi MZP chuan kan dodal zel ang," MZP Presdent chuan a ti.