Aizawl: India rama zirna in sang (College leh University) quality tihhmasawnna tura hma latu, National Assessment and Accreditation Council (NAAC) chuan Government Kolasib College chu second cycle atan October 3-4 chhung khan an endik a, B grade an pe.

Endiktute hian College Self Study Report a ziakte chu a dik ngei em tih an rawn finfiah a, College dinhmun, hmalaknate, inrelbawl dan leh kalphung te ngun takin an rawn enfiah a ni. An report chu NAAC headquarters, Bangalore, ah an thawn a. Tehna hrang hranga teh hnua NAAC in Government Kolasib College grade a pek chu ‘B’ Grade a ni.

Government Kolasib College hian T.B.C. Liandala Principal a nih laia 'C++' Grade hmua, kum 2006-a N.A.A.C. Accreditation kum 5 chhung atana a lo neih chu kum 2011-ah khan a thi (Invalid/Expired) tawh a. Kum 8 dawn lai Re-accreditation a due hnuah Government Kolasib College chuan Cycle tharah 'B' Grade hmuin, kum 5 chhung atan N.A.A.C. Accreditation a lo nei ve leh a ni.