DOWNLOAD OUR APP

Read latest news on your phone
app-store
Nadal-a lalna ramah Novak chungnung
Jun 12, 2021

Roland Garros-a lal ang maia player dang laka chungnung Rafael Nadal chu zirtawp zan khan Djokovic chuan a vawi hnih nan a hneh a, he mualah hian Nadal hi vawi 13 zet a lo champion tawh a ni. 

French Open mipa single semi-final inkhel hmuhnawm takah World number 1 Novak Djokovic chuan Roland Garros-a clay lalpa an tih mai Nadal-a lal ram chhuchat tura court chhunga inbeihna  hmuhnawmah Serbian top seed Djokovic chuan 3-6 6-3 7-6 (7-4) 6-2-in kum 4 chhung zet champion zawn tawh Nadal chu hnehin final a lut.

Khum rual loh a record ropui belh chhah nan Roland Garros-a vawi 14 champion tum Nadal-a beihna chu a hlawhchham. Tun tum hi Roland Garros-a match 108 a khelh tawha a tlawm tum thumna chiah a ni bawk. 

Hnehna changtu kum 34 mi Djokovic hian zanin hian final-ah Stefanos Tsitsipas a hmachhawn ang. 

An inkhelh boruak sawiin Djokovic chuan,"Match ka khelh tawh a khelh hautak leh hahthlak ber pakhat a ni, zanin inkhel zet hi chuan hriatreng a hlawh tawh ang," a ti hial. 

Coronavirus darh tur ven nan sorkar-in khuahkhirhna khauh tak hnuaia inkhel hi mipui 5000 zetin a hmunah an en. France sorkar-in zan lam curfew a puan hun pelh rak thleng an inkhelh avangin, entu mipui te tan curfew pawh an thlah dul phah hial.   

Kum 35 mi Spaniard Nadal hian rin lawk ang ngeiin an game hmasa lam chu a thunun hneh hle a, 6-3 in set a la thei. Set hnihnaah Djokovic chungnungin 6-3 in a la let ve leh a, hemi hnu atang hi chuan Nadal hian Djokovic hi point lamah a hneh lo chho tial tial. 

"He court-a Rafa hneh tur chuan tennis-a kan theihna sang ber lantir a ngai thin a, zanin hian tennis-a ka theihna sang ber chu ka lantir ta a ni," tiin Djokovic chuan inkhelh zawhah a sawi. Sawi zawmin, "Inkhelh laia ka rilru put dan tak kha sawi chhuah a harsa ka ti a, Mahni infuihin pressure ka neilo han ti bawk mah ila, a nihna takah chuan pressure chu a awm tlat thung. Mahse, chu pressure chuan ka game leh khelh danah match tha taka khel turin min pui hlauh thung a ni," a ti. 
Djokovic hi a champion a nih chuan Grand Slam title 19 a lakna tur a ni dawn a, a chungah hian title 20 la thei player ropui pahnih Nadal leh Federer te chiah an awm ang. Head-to-head ah Djokovic hi chungnung zawkin men's single an intum tum 58-ah vawi 30 hnehna a chang tawh. Frenche Open bikah hian tum hnih hneh tawhin kum 2015 quarter final-ah alo hneh tawh bawk. Djokovic hian Nadal-a record ropui neihna Monte Carlo, Madrid leh Rome-ah te Nadal-a hi a tuk dawl vek tawh a ni.  

Semi-final lehlam Tsitsipas

French Open mipa singles semi-final pakhat zawkah Frence Open mai nilo tui let hnua Grand Slam title la chawi ngai lo ve ve player pahnih Stefanos Tsitsipas leh Alexander Zverev te an inhmachhawn a,  He inkhelh hmuhnawm takah hian tun hnaia che tha em em Stefanos Tsitsipas chuan chakna changin final-ah Djokovic-a nen an inhmachhawn dawn a ni.    

Match inhneh tawk takah hian an inchungnun chhawk a, hun tawp lama Alexander Zverev game a fuh loh zar zovin Tsitsipas hian 6-3 6-3 4-6 4-6 6-3 in hnehna a chang ta zawk a ni. 

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh