ZALEN June 15, 2026 : Tukin zing dar 6:00 vel khan Kangpokpi District, Manipur-a Kuki khua Leilon Munlui chu beih a ni a, he khua hi Leilon Vaiphei leh Konsakhul khaw inkara awm a ni a, A khaw mi te chuan NSCN IM leh ZUF-K te thil tih niin an sawi. Hliam engemaw zat zingah zirlai pathum chu RIMS-ah dahluh an ni.

He inbeihna avanga hliam tuar na zual zirlai pathum- kum 15, 17 leh 20 mi te chu sipai damdawiin-a endik an nih hnuah RIMS, Imphal lamah enkawl tura hruai an ni a, Security Force lamin hliam te an dahluh dawn hian hospital kawta pungkhawm Naga te chuan heng hliam te hi hospital-a dah luh an remi lo chungin dah luh an ni a, hemi avang hian Kuki lam hruaitute chuan damdawiin kawta pungkhawm te hi hliamte himna atan a hlauhthawnawm theia an ngaih thu an sawi.

L. Munlui Village Authority chuan Konsakhul-a CRPF camp atangin beihna hi an tawk niin an sawi a, hliam na tak tak enkawl ngai an tam an ti a, an rawn beihna atanga hian an khua hi meter 100 vela hla a ni, tiin, NSCN IM te hian CRPF thlawpna an dawng niin an ngai a, an beihna leh an insasengna hmun hi he hmun atanga hian ni ngeiin an ngai a, CRPF te hi Leilon Munlui leh a chhehvel khaw mipui tan hian an thlamuanpui awm lo niin an ngaih thu an sawi. CRPF te chu an inkulhna hmun atanga hian chhuak se an duh bawk.

Kuki Inpi chuan he thil thleng hi na takin an dem a, Manipur sawrkar chu he thil thlen dan hi chhui chiang nghal turin an ngiat a ni.