-Mahmuaka Chhakchhuak

Mi dang i ni lo a, nangmah ngei i ni tih kha inhre hmasa phawt ang che. Lemchanna hmunah chuan mi dang lem changin hun i hmangin i awm pawh a ni ang, chu hmunah chuan i nihna lang hauh loa thiam takin i chanvo i hlen thei a nih phei chuan lemchang thiam tak i ni tihna a ni ang. Chutiang lemchanna hmun anga nun hman i tum reng a nih erawh chuan hre chiangtu apiangte’n an nuih tet tet hlauh thung ang che. A chhan eng nge kan tih chuan mihring hian lemchang nun hi enge maw hun atan chauha kan ruat vang a ni.
Sakhaw rawngbawlna hmunah hian lemchangten hmun chan an tum thin a, a chang thiamte phei chuan lang hauh loin rei tak an chang thei thin. Nimahsela, chu lemchang chu a lemchang tih hriat chhuah hun alo awm nge nge thin a, Sakhuana kawngah chauh pawh a ni lo, politics-ah pawh a ni a, thil dangah pawh a ni vek tho. Nulat tlangval inngaihzawnna thlengin a ni vek mai. Lemchanna chuan rei a daih tak tak ngai loh avangin a tlo ngai lo a ni.
Nangmah tinangmahtu chu nangmah bawk i nih avangin nangmah kha nangmah angin awm tawp rawh. Siam danglam theih tawh ngai loh tur i hmel avang khan zakin kimki duh ngai suh la, siam that leh tihdanglam theih zawk i mizia leh tawngkam hman thin erawh a tha lo a nih chuan tihdanglam tum zawk ang che. I pumraw len bik vangin langsar bik ta lua-ah inngai lo la, mi dang aia i tet deuh zawk avangin inthlahrung ngai bawk suh ang che. Mi reng reng hi kan hriat rengna zawk chu an thiltih leh tawngkam vang zawk hian kan hre reng thin zawk a ni. Vankhama chu Mizo paah chuan palian pawl tak chu a ni ngei mai; nimahsela, tun thlenga kan hriat rengna zawk chu a palen lamah ni loin hla phuah thiam a nihna zawk chu a ni. Hmeltha leh pian nalhte hi chu a hlutna hmun leh pawimawh bikna hmun chu an awm teuh meuh mai a, chu hmunah chuan an danglam bikna chu an lansarh phah reng bawk a ni. Nimahsela, chu hmun chu a bika buatsaih a ni fo bawk tih hrereng ang che.
Kei hi mi pangngai tiat ve lai ka ni a, feet 5 leh inches 8 riat-a sang ka ni nain inthlahrung chi tak hi ka ni a, ka inthlahrun leh zahzum avang hian inhmuh tet chem chem chang a awm fo mai. A chang chuan hmelchhe bik tlatte hian ka inhre bawk a, insit chang ka ngah mai, chutiang chuan nun a hneh awl phian mai lehnghal a, sim a that rualin sim erawh a har em em mai bawk si a, thil tha lo tak a ni. Nimahsela, tunah chuan chutiang rilru chu paih bo ka tum ve hret hret a, paih bo hun a la thlen ngei pawh ka ring a ni. Ka incheina avanga ngaihdan neitu chuan incheina ka tihdanglamin a rilru a danglam leh mai dawn a, chutiang chu reilote thil mai chauh a ni. Chu aia pawimawh zawk chu ka thiltih leh tawngkam zawk hi a ni. Chu chu tihdanglam theih chu a ni.
Mi i hriatrengna kha han ngaihtuah teh, danglam thei lo an hmel chu a ni ngei ang. An hmel dawt chiaha i hriat rengna kha an thiltih leh an tawngkam a ni ang. Chutiang chuan nangmah pawh an rawn hriat rengna tur che a ni. Danglam thei lo thil avangin i awm dan tidanglam suh la, inferiority complex neih phah ngai suh ang che. I kianga awm chu nangmah ang bawka mi pakhat ve mai a ni tih kha hre reng la, a chunga that i chhuah chuan i chungah pawh that a chhuah ve thei tih hria la, rilru pangngai takin kawm ang che. A palen avanga a laka inthlahrung i nih chuan mi pangngai i pha meuh lo a ni ang a, a pa tet avanga i tawngkam i thlahdah a nih chuan mi chapo tak i ni tihna a ni ang a, nun awmzia i hrelo tawp tihna a ni ang.
Nun awmze hriatna bul chu mi zawng zawng hi Pathian siam vek kan ni a, angkhat vek kan ni tih hriatna hi a ni. Hmeltha pawh hmelchhia te vanga tha mai chauh an ni a, pumraw liante pawh pumraw tête vanga lian mai chauh an ni. Ramtuileilo leh piansual vanga danglam chu an awm teh meuh mai, chungte chu vanduai vanga thleng a ni a, chutiang chu en hniam phah nana i hmang a nih chuan i rilru chu tihdanglam vat a ngai tihna a ni. Khawvelah mi chi hrang hrang leh ze chi hrang hrang neite kan cheng a, mize inang lo tak tak kan nihna hi a famkimna pawh a ni. Chuvang tak chuan i mize pangngai tak khan nung tawp la, lemchangin nun hman tum ngai suh ang che. I mizia chu a tha lo a nih chuan siam that tum la, mi thiltha tih chu entawn atan hmang thin ang che. Nimahsela, entawn theih loh chi leh entawna tlo ngai lo tur erawh a awm a, mi tawngkam thiamte thluk ang zela tawngkam hman i tum tlat a nih chuan mi nuih i ti za mai mai thung ang.
Khawvel hi mi hausate vanga nuam a ni ngawt lo a, mi retheite vanga hrehawm pawh a ni ngawt hek lo, intluk tlang taka kan awm avanga nuam mai chauh thin a ni. Mi rethei pawh mi hausa bula tlangnel taka a nuih bawk bawk theihna chu a kianga mi chuan amah anga a hmuh vang a ni a, ni lo sela a nui ngam hauh lo ang. Chutiang bawkin thawmhnaw man to tak ha pawh chuan a kianga awm - berh ve tak chu a nuihsawh ngawt chuan ama khawvel chu a tizim sawt tihna a ni.
Nimahsela, hei erawh ka hrilh duh che. Zahawmna hi hmel atanga teh tur a ni lo a, hmuhsitna hi retheihna vanga lo awm ngawt pawh a ni lo. Dik tak chuan mi pakhat leh pakhat hi inzah vak tur bik kan awm em em chuang hleinem; nimahsela, kan thiltih avang zawk erawh chuan zahawmin kan awm thei zawk a, kan thiltih avang vek chuan hmuhsitawmin kan awm thei bawk a ni. Chu erawh nang leh keia kuta hian a awm thung si. Thawmhnaw chu pawn lama min cheitu mai chauh a ni a, sum leh pai pawh hmanruaa hmang thiamtu inkara awm mai chauh a ni. Hausakna hi sum leh paia teh tur a ni ngai lo a, chutiang bawkin retheihna pawh hi mahni thinlung atanga lo awm mai zawk a ni. I hringnun chu i kuta awm a ni e.