ZALEN, December 07, 2025: Gold medal tela national ranking tournament-a medal paruk a lak hnuah Malsawmhlua (Mama) chuan a vawi khat nan national championship-ah medal a vaw chhuak ta a. Odisha-a Yonex-Sunrise 37th Sub-Junior (15 & 17) National Badminton Championship 2025-ah Inrinni khan boy’s doubles-ah silver medal a dawng. 

Thawhtanni atanga Bhubaneswar-a inelna tanah hian P&E Veng, Serchhip rawlthar hi Aanayan Bora nen inkawpin final an lut a. Final-ah champion tura rinkai ber, Seeded No. 1 Punith S. leh Pavan S. te tangdun lakah 19-21, 10-21-in an chak ta lo hlauh a ni. 

Mama leh Assam rawlthar tangdun hi Seeded No. 7 an ni a, round hmasa ber awlin round of 32 atangin an tan a, Chonvung Pochury leh Heloka Swu te inkawp lakah 21-10, 21-10-a hnehin round of 16 an lut.

Round of 16-ah hian awlsam takin Parth Gawri leh Harsith te laka 21-17, 21-12-a hnehna chang an chang zui a. Quarter final-ah anmahni aia champion tura rinkai zawk, Seeded No. 4 Akhil Reddy Bobba leh Nischal Chand te lakah 21-15, 17-21, 24-22-a chak leh hramin a thiam pali zingah an inhlang kai. 

Semifinal-ah Seeded No. 6 Jangjeet Singh Kajla leh Arnav Sharma te thian dun lakah tang tlang dun hlein 21-19, 22-20-in an hneh a, final an lut a. A tawpah Seeded No. 1 lakah tlawmin silver medal an la. 

Mama hian national ranking tournament-ah U-15 boys’ doubles huangah gold medal pakhat leh silver medal pahnih a lo la tawh a. U-17 boys’ doubles-ah bronze medal pakhat a lo la tawh bawk a, national championship bikah erawh tun hi a medal hmasa ber a ni.

New Serchhip Badminton Club tana khel mek, Mama hi Tata Trusts, NEIDA, Pulela Gopichand Badbminton Academy (PGBA) leh Mizoram Badminton Association thawhhona, Mizoram Badminton Initiative Phase 1 hnuaia badminton khel tan niin tunah hian PGBA hmunpui, Hyderabad, Telengana-a awm mek a ni a. MBAchuan a hlawhtlinnaah lawmpuiin a aia sang zawk thleng turin duhsakna a hlan.

Mama hi mi mala Mizoramin national badminton championship (sub-junior leh junior)-a medal la thei a neih pangana a ni a. Ani hmaa lo la tawhte chu:

1. Samuel Lalnunmawia & Lalchungnunga, U-13 Boy's Doubles (2007)

2. H. Lalthazuala, U-17 Boy's Singles (2023)

3. C. Lalramsanga, U-19 Mixed doubles (2024) & U-19 Boy's doubles (2025)

4. Lalrempuii, U-19 Girl's doubles (2024)