Aizawl; Director General of Police Devesh Chandra Srivastva chuan, “Tun hnaia National Crime Report chhuakah Mizoram hi mi sual thiam loh chantir tawhten sual dang an khawih nawn lehna rate-ah a sang fal em em mai a. Drugs leh ruihhlo dang hman sual kawngah kan sang hle a ni,” a ti.

He thu hi Zirtawpni kaltaa Serchhip a tlawhnaah sawiin police an indaih lo tih a sawi a, “Police post hi za zela 33 vel zet a ruak mek a, Police Quarters repair leh a thar mamawhna pawh a sang hle a ni,” a ti a. Central YMA-in CADS a din chu lawmawm a tih thu sawiin, “Tun hnaiah CYMA-in Central Anti Drugs Squad an din hi a lawmawm hle a, nasa takin Mizoramin a tangkaipui dawn a. Kan thalai ruihhlo ngaia talbuai mekte hi mi sual an ni ngawr ngawr lo va, kawng dik lo zawh palhin zui tur dik lo an zui palh a, salah an tang a, chhanchhuah a, tanpuia kawng dik kawhhmuh an mamawh a ni,” a ti a. Thalaite kawng dik loa hruai botu ruihhlo zuartute chu na taka hrem a pawimawh tih a sawi bawk.

SP Serchhip Stephen Lalrinawma chuan Mizoram Police lal berin Serchhip a tlawh chu an lawm tak zet tih sawiin, tlawmngai pawl leh VDP te nen inkawmhoin police leh tlawmngai pawlte thawhhona kawng tinrengah a tangkai hle dawn niin a sawi.