ZALEN, May 19, 2026: Kawng rualrem lova bike intlansiakna, MRF MoGrip FMSCI Supercross National Championship 2026-ah Mizo tlangval, Shaun Lalremruata Chhangte-in dawnsan a lawn phak leh ta.

Season kal meka Coimbatore, Tamil Nadu-a Pathiannia Round 3 intlansiakah College Veng, Aizawl tlangval hian India No. 2 a nih mekna, Private Expert Class-ah tlan lehin 3-naah a thleng a ni.

Shaun-a hi dawhsan a lawn pha lo tep a, a bike-ah harsatna awm deuh chunga tlanin 4-na ni tura ngaih a nih tawh laiin a tawp (finishing line) thlen dawnah chiah a hmaa tlan lai zuan khumin nomawi la phakin a awm chiah chiah a ni.

Round 3-ah hian category dangah erawh a bike a that tak loh avangin a tlan chhunzawm thei ta lo va, tun ṭumah hian round hmasa lama pit mechanic-a kal, a thianpa, Vanlalhmangaihsanga’n a kalpui leh a ni.

Tar lan tawh thin angin Shaun-a hi nikum hmasa khan hetiang inelnaah hian inlan tanin Mizoram atanga tel hmasa ber leh awmchhun a la ni a. A tel hmasa ber kum hian nomawi pali lai a hawn nghal thei a, nikum khan pathum a la leh thei bawk.

Shaun-a te thian dun hi Thawhtanni khan Aizawlah an let leh tawh a, season kal mekah hian kum chawhnu lamah tlan hmabak an la nei a. Lawmman a la thei chu Pathian vang chauh a nih thu sawiin lo tana tawngtaipuitute zawng zawng chungah lawmthu a sawi.