ZALEN, Apr. 27, 2026: Kawng rualrem lova bike intlansiakna, MRF MoGrip FMSCI Supercross National Championship 2026 kal mekah Shaun Lalremruata Chhangte chuan round hnihna intlansiak pahnihah dawhsan a lawn pha leh.

Season kal mek Round 2 intihsiak hi Inrinni zan khan Goa-a Navelim-ah neih niin College Veng, Aizawl tlangval hian India No. 2 a nih mekna, Private Expert Class-ah a tawp thlen dawnah tak tak a hmaa tlan zuan khumin 3-naah thlengin dawhsan lawn phaah a inhlang kai chiah chiah a ni.

Indian Novice Class-ah company bike leh an rider thate karah inlanin bawkin dawnsan a lawn phak leh chiah bawk a, 3-na nomawi a la bawk.

Shaun-a hian lawmman pahnih lai a la leh thei chu Pathian vang chauh a nih thu sawiin amah buapuitu a thiante leh a chhungte, lo tawngtaipuitute chungah lawmthu a sawi.

April 11-a Meghalaya-a season kal mek hawnna, intlansiak hmasa berah khan Shaun-a hian Class 9 - Local Class Group B Stroke 2/4 Upto 260cc-ah hmarchhak mi 24 inelnaah 1-na a ni tawh bawk.

Tun season hi Shaun-a’n championship-a a inlan tum thumna a ni ta a. Kum 2024-a a inlan hmasak ber tum khan Mizo zinga inlan hmasa ber niin nomawi pali a la nghal theih a. Nikum pawh khan nomawi pathum a la leh thei bawk.

Tun season-ah hian a thianpa, Vanlalhmangaihsanga’n pit mechanic turin a kalpui thin a, round dang intlansiak leh hmain Thawhtanni khan Aizawlah an haw a ni.