ZALEN, Apr. 14, 2026: Kawng rualrem lova India-a bike intlansiak ngaihhlut hlawh, MRF MoGrip FMSCI Supercross National Championship 2026-ah season hmasa pahnih pawha hming lo chher tawh, Shaun Lalremruata Chhangte chuan season bul tha taka tanin round hmasa berah chak ber nomawi a la leh nghal.

Inrinni zana Kurkalang Stadium, Bhoi Rymbong, Meghalaya-a season hawnna intlansiakah hian College Veng, Aizawl tlangval hi India No. 2 a nih mekna, Private Expert Class-ah leh class dangah a tlan leh a. Class 9 - Local Class Group B Stroke 2/4 Upto 260 cc-ah pakhatna a ni.

Shaun-a hi a mi mala tel niin Mizorama atanga hetiang inelnaa tel hmasa ber leh tel awm chhun a la ni a. Lawmman a la thei hi Pathian vang chauh a nih thu leh tawngtaipuitute chungah lawmthu a sawi tak a.

Shaun-a hian kum 2024 khan nomawi pali a lo hawn tawh a, nikum khan pathum a la thei bawk a. India-a Private Expert Class-ah National Supercross Championship Ranking No. 2 ni mekin Thawhlehni khan Aizawl a lo haw a, tun season-ah intlansiak dang hmachhawn tur a la nei nual bawk.