March 10, 2024; T. Lalbuanga (42) h/o Manngaihliani Nausel chu nimin chawhnu dar 3 bawr vel khan tuiah tlain a boral a, vawiin chhun dar 12 khan vui a ni.

Buanga hi Nausel Sub-Village Secretary tang lai a ni a. Hun eng emaw chen damdawi ina a awm hnuah tun hnai mai khan a chhuak a. A taksa a la chak tawk lo hle.

Nimin lamah chengkawl ei a châk thu a chhûngte bulah a sawi a. A nupui, a tute mipa 2 leh a ṭhian mipa 2-te nen Tuirial lui an pan a. Luia an awm lai hian naupang pakhat sliper chu tuiin a lên a, hei hi naupang hian chhar tumin a ûm a, a thlanga lî-ah pil mai thei dinhmuna a din tâk avangin Buanga hian chhan tumin a ûm zui ve nghal a. Ani hi taksa chak loh a nih avang leh tui chhûng chu a lo nâl deuh avangin a tâl buai zui a. A ṭhian pakhat hian mau hmanga chhan tumin a bei a, naupang hian mau hi lo man hmanin, Buanga erawh hi chuan mau hi man hman ta lovin tuiah hian a pil zui ta a ni (An ṭhian pakhat hi hmun danga a lo kal sawn lai a ni thung). A chêtsualna lî tak hi a thûk tehchiam lo a, feet 6 bawr vel nia sawi a ni.

An chesual tih hriat a nih veleh Nausel khawtlang mipuiten an chêtsualna hmun hi an pan nghal a. Hemi hnu hian Sihphir Venghlun Branch YMA pawh an che chhuak ve nghâl a ni.

Tlai lam dar 4 bawr chho velah a ruang hi lâk chhuah a ni a. An chênna in tlai dar 6:40-ah thlenpui a ni. A nupui leh a fate mipa 2 leh hmeichhia 1 a kalsan.

An chetsualna hmun tak hi R. Lalrochhara (Sihphir Venghlun) huan mawng, Tuirial luiah a ni.

UPC (NEC)-a lâwi a ni a. Vawiin chhûn dar 12 khan vui a ni.