NBA logo han mitthla la, rawng pawl leh sen rinchhanin mi pakhatin tlan paha ball a vawm sawt lai hlim var (silhouette) i mitthla chhuak nghal ang.

Tlan paha ball vawm sawttu, NBA logo atana an entawn ber, basketball legend Jerry West chu Thawhlehni khan kum 86 mi niin a thi tih a khelhna thin, Los Angeles Clippers chuan a puang.

West-a hi Los Angeles Lakers tan NBA Finals-ah vawi kua zet inlanin vawi khat, kum 1972 khan a champion.

NBA-a kum 14 a khelh chhungin season tin NBA All-Star-a tel phak ziah khawpa che tha leh thiam a ni.

“Basketball chhinchhiahna pakhat, amah hretu apiangin thiana an chhal, Jerry West-a chu tukin khan kum 86 mi niin a thi a. A nupui, Karen-i a kalsan,” tiin Clippers chuan an puang.

West-a hi league chanchina Wilt Chamberlain leh Oscar Robertson te dawta point 25,000 thun tling hmasa ber niin point 25,192 nen inkhelh a chawlhsan.

1960 Rome Olympics-ah USA tan pawh inlanin gold medal a hlawh chhuak a, inkhelh tawp dawn hun pawimawha a chet fuh thin avanga ‘Mr Clutch’ tia koh thin a ni.

American hian kum 1974-a inkhelh a chawlhsan hnu kum hnihah coaching-ah a kal leh a, season thum chhung Lakers a enkawl.

West-a hi NBA executive a ni zui a, kum 1980 chhova Showtime Lakers dintu niin kum 10 chhung lekin vawi nga an champion a ni.

Kum 2000 khan Lakers chu kalsanin Memphis Grizzlies, Golden State Warriors leh Los Angeles Clippers-ah executive-in a awm kual leh bawk.

“Jerry West-a hi basketball-a mi bik leh kan league tana kum 60 chuang mi pawimawh a ni,” tiin NBA commissioner Adam Silver chuan a sawi.

WEST-A LEH NBA LOGO

West-a hi NBA logo-a mi ngei hi a ni em tih hi sawi chian a ni ngai lem lo va, ‘amah ngei a ni’ tih hi hun rei tak thup a ni a. A thih chiah hian sawi lar thar leh a ni ta a ni.

Kum 1969 khan NBA hian logo siam thiam, Alan Siegel-a chu an ruai a, ani hi a hma kum lawka Major League Baseball (MLS) logo siamtu a ni a. Hetih lai hian West-a hi Los Angeles Lakers tana a vanglai hmang mek a ni thung.

Siegel-a duan logo chu NBA-in a pawm a, rei tak hman a nih hnuah tu nge a lem chuang tak hi sawi a ni ngai lo va; mahse, mi tam tak chuan West-a ngei hi a nih an ring tho thung.

Kum 2010 khan a siamtu ngei a inpuang ta a, The Los Angeles Times-in an kawmnaah $14,000 hlawha logo siamtu, Siegel-a chuan, “Jerry West-a a ni e,” a ti ta chauh a ni.

Siegel-a’n a sawi dan chuan logo duang tur hian a hun laia infiamna chanchin ziak thin leh broadcaster, a thianpa ni bawk, Dick Schaap-a’n Sport magazine-a thlalak hluite enkual tura a rawn anga a enkualnaah a chhar chhuak tih a sawi.

“Jerry West-a’n khelmuala ball a tlanpui lai thlalak hi ka hmu ta a. New York-a sei lian ka ni a, ka pa hian Madison Square Garden-a college leh pro game enna tur season ticket a nei thin a, West-a khel pawh hi ka en fo tawh thin a ni,” a ti.

Siegel-a hian logo tur hi 50 dawn a duang chhin a, West-a’n ball a tlanpui lai, Wen Roberts-a’n a thla a lo lak fuh chu a rilru hnehtu ber a ni a. Chumi entawna a siam chu amah ruaitu, khatih laia NBA commissioner, J. Walter Kennedy-a hnenah a thlen ta a ni.

“Kennedy-a chuan thutlukna a siam nghal a, engmah zir chian leh sawiho pawh a awm lo, ‘Kan tifel a ni lo’m ni?’ a ti nghal a ni,” tiin Siegel-a chuan a sawi.