Aizawl 26th January, 2019: PRISM Party chuan India Republic Day boycott in nimin khan an office-ah flag dum an zar. Citizenship Amendment Bill avangin MNF Party chu NDA leh NEDA atanga inhnukdawk tura phutin Mizorama BJP hruaitu leh member te bang vek turin an phut bawk.
Prism chuan, “Citizenship Amendment Bill hi Bangladesh ramri hawnna- kan ram, kan hnam leh kan sakhaw tana him lo a nih avangin Lok Sabha-a an pharh hlimah India Hmarchhak State-a kan thawhpui te nen kan duh loh leh dodal thu India sorkarah kan thlen nghal a, dodalna lantir nan sorkar kan ngenin kan theih ang angin hma kan la,” an ti a, “NESO te, Zirlai Pawl te leh NGO Coordination Committee in dodalna an kalpui leh midangin dodalna leh duhlohna an lantir zawng zawng kan thlawp vek a. Nasa zawka hma lak a la ngai kan ti,” an ti bawk.
Prism hian sorkar chu hma la thei ber tur an ni tih sawiin All Party Meeting ko a, hma la turin an ngen, tih an sawi a, nghawng a neih len theih nan MNF Party hi NDA leh NEDA atanga inhnuhdawh turin an duh a, BJP Party-a awm Mizo te an party atanga an ban vek an phut bawk.
&&&&&