Aizawl March 15, 2024 : Mizoram State Consumer Dispute Redressal Commission chuan New Life Hospital chu Lalduhawma leh a fapa Malsawmzuala Tlau te'n Lalduhawma nupui J. Zosangzuali leh a naupai lai thih chungchangah zangnadawmna Rs. 43,48,480/- pe turin a ti. Hetihlai hian New Life lam te chuan court sang zawkah kal an tum tih thu dawna a ni.

Lalduhawma nupui J. Zosangzuali chu nau nei turin November 12, 2016 ah admit a ni a, darkar riat zet nau veina pek a nih hnuah naute a nei mai theih loh avangin zan dar 9 velah tih tawp leh a ni a. A tuk ni 13.11.2016 zing dar 6.30 ah nau veina pek leh a ni a, nau veina pek a nih hnu darkar khat a pelh hnu lawkah ICU a dahluh ngai khawpin a awm ta a, ICU a dah luh a nih hnu hian naute (hmeichhia) thi sa in a hring a, amah pawh hi tlai dar 4.30 ah a thi zui leh ta a ni.

J.Zosangzuali leh a naupai lai thihna a vanga lungawi lovin New Life Hospital in an enkawl danah hian Medical Negligence awma a hriat avangin Mizoram State Consumer Dispute Redressal Commission-ah Complaint a thehlut ta a, Rs.98,45,440/- New Life Hospital chu chawi turin a phut a. Hun rei tak case hi ngaihtuah a ni a, Doctor hrang hrangte pawh witness atan koh an ni a, thutlukna Judgement siamin New Life Hospital chu Medical Negligence chungchangah thiam loh chantirin Rs. 43,48,480/- chawi turin a ti ta a ni. Heng an pawisa chawi tur hi ni 90 chhungin State Commission ah deposit/pe turin a hriattir bawk.

Hetihlai hian New Life Hospital aiawh te chuan he case-ah hian Negligence awm lova insawiin theihtawp an chhuah tih ZALEN an hrilh a, National Consumer Court-ah appeal an tum tih an sawi.