Aizawl; Central YMA, MUP, MHIP, MZP, MSU telna NGO Co-ordination Committee chuan Tripura Transit Camp-a Tuikuk ten vote an thlak an duh lohzia lan tir nan leh vote hi chhiar a nih loh nan, April ni 7, 2014 zing dar 5 atanga darkar 72 awh Total Bandh khauh tak huaihawt an tum chu an kaltlangpui dawn. NGO Co-ordination Committee hruaitute hi nimin khan Home Minister chuan kawmin thulh turin a ngen a. Hemi hnu hian NGO hruaitute hi Central YMA Office-ah thukhawm zui lehin, Total Bandh huaihawt an lo tum tawh chu kaltlangpui an rel thlu ta niin thu dawn a ni. "Mizoram mipui zawng zawng ten ram leh hnam rilru pu chunga thahnemngai taka tihlawhtling turin ngen leh beisei kan ni," tiin NGO Coordination Committee chuan an ngen a. Mizoram mipui vote ni lova, Tuikuk vote (Transit Camp) hmanga MP thlan tlin an lo awm a nih pawhin, Mizoram hmangaihna avanga inhnukdawk leh nghal turin candidate-te an ngen bawk. Nizan khan Total Bandh neih tur chungchangah hian Central YMA chuan khawpui chhung YMA Branch Office Bearers te ko-khawmin duty dan tur ruahmanna an siam nghal nia hriat a ni. Total Bandh-in a huam loh turte Chanchinbu mi leh Chanchinbu semtute, Bawnghnute sem, damdawi In a thawk, Dam lo, Tui sem, P&E Control Room Duty, Dan leh thupek kengkawhtute.