Aizawl December 9, 2023 : NITI Ayog-in Virtual event hmanga Aspirational block program 2023 delta ranking a tihchhuah ah Ngopa block chuan Zone 1, hilly and North Eastern areas ah lawmman pahnihna la in vaibelchhe 1 (Rs1 crore) an dawng.

Aspirational Block Programme (ABP) hi NITI Aayog hmalakna a ni a, India ram pumah block hmasawn ngai zual thlanchhuah bik 500 te hmasawnna chak zawka kalpui tumna atan a ruahman a ni.

ABP hi Aspirational Districts Programme (ADP) zulzui a block level a hmalakna pawimawh tak a ni.

Block-te hi geographically-in zone parukah then an ni a, zone tin atanga block pahnihte chu ranking pek an ni bawk.

Zone 1-ah hian tlangram leh hmarchhak State bakah thliarkar ho te pawh an tel a, pakhatna leh pahnihna chu Amri block, West Karbi Anglong, Assam leh Ngopa block, Saitual Mizoram te an ni.

Award dawng tura tehna hi chi hrang hrang a awm a, chung te chu hriselna, zirna, ei bar zawnna, nitin mamawh bulthut leh khawtlang hmasawnna chungchang te an ni.