Aizawl : Vawiin khan Mizoram sawrkar aiawh leh Assam sawrkar aiawh te chu Aijal Club-ah inbiakna an nei a, he hunah hian thutlukna danglam tak siam a awm hran lo a, chutih rual chuan Ministry of Home Affairs, Government of India leh state pahnih chief minister te inbiakna anga harsatna insiam tawn lo tur leh ramriah remna tluantling a awm theih na atana hmalak ho an rel. CYMA chuan he inbiakna hian boruak tha tak a thlen thuai an beisei thu an sawi ve bawk.

National Highway-306 danchah chungchangah thutlukna engmah an nei rih lo a, press mite an hmachhawn naah erawh Assam Border Protection & Development minister Atul Bora chuan sawrkar hmalakna a nih loh thu in a chhang. Press mite hi Mizoram Home Minister Lalchamliana leh Rural Development minister Lalruatkima bakah Assam lamah hian Atul Bora bakah minister tho Ashok Singhal te chuan an hmachhawn. Mizoram lam leh Assam press lam ten zawhna hrang hrang an zawhte chu a khawi lam mah hian an chhang mumal lo a, zawhna te hi a hma lama thil thleng chungchanga a nih deuh zel avangin chhan tul an tih loh thu leh hmalam pana remna zawng an nih avangin press lam chu thil kal tawh theihnghilh turin an chhang.

Inremna an neih ang chuan state pahnih te hian ramri-a remna a awm theihna atana central lamin force a dah tur chu lawm taka lo dawnsawn an remti. hemi avang hian ramri-ah Forest mi emaw Police emaw, patrolling leh inpawng nek loh ni se tiin, heng hmunah te hian force awmsa bak tirh belh lo turin thutlukna an siam. 

Assam leh Mizoram aiawh te hian a mihring cheng ten remna leh muanna a awm theihna turin a tul anga hmalak an remti dun bawk.

Mizoram sawrkar chuan July 26, 2021 a thil thleng avanga nunna chan te an tawrhpui thu leh inhliam te chu tha chhuak thuai turin an tihna a tel.

CYMA chuan inbiakna hian rah tha tak a chhuah an beisei a, president Vanlalruata chuan press mite zawhna a chhannaah North East mi inkara hetiang inhmuh thiam lohna a awm chu pawi a tih thu a sawi a, Hri leng boruaka pawh Assamese te enhranna a awm loh thu leh lirthei khalh tangkhang te pawh eitur an pek thu an lo hrilh thu a sawi. "Thil tam tak kan lo hrilh a, khulam atanga an ngaihdan ang ngawt hi chu tawh lo. A takin an rawn hmu niin ka hria a, a lawmawm kaan ti ang reng khawp mai," a ti. Kawng dan chungchangah Ruata chuan, "Tunah hian an lo kal a, Meeting kan zo a, Travel advisory te pawh an hlih mai a rinawm. Kawng dan pin chunchang pawh hi kan lo sawi a, 'Ni e, kan lo kal alawm," an ti a, chuvangin boruak tha tak chu tun atanga rei lo teah a awm hi kan lo beisei ve dan leh kan hmuh dan a ni e," a ti.