Aizawl: Lawngtlai atanga Siaha district zero point pawh tur National Highway 54 kawng laihzauh hna thawh mek ah zangnadawmna vanga harsatna tawk, Lawngtlai DC in thuneitu sang zawka a thlen mi 111 a awm mek.

Thudawn danin kawng laih zau in a tihchhiat ram neitute hnenah zangnadawmna pek a ni a, an harsatna tawh te hi a theih ang angin chinfel sak an ni a, mahse an chinfel mai theih loh, thuneitu sang Arbitator ah case 111 thehluh a awm nia thudawn a ni. Lawngtlai DC Dr. Andrew H.Vanlaldika chuan tuna ram lak tur a tel lo, a taka hnathawh hun a an ram tihchhiatsak an awm a nih chuan On the Spot Purchase hmangin, zangnadawmna tihfel sak theih a ni a, mipui te mangang lo turin a chah.

National Highway 54, Lawngtlai to Zero Point (Siaha District) inkar hi Kilometres 39 a thui niin, hnathawktu Power Mech Projects Limited hotute chuan zangnadawmna vanga khawih theih loh Kilometres 6 chuang a awm thu an sawi a, cheng vaibelchhe 446 senna tur ah hian hnathawh tur a ruahman atangin 6% vel thawh zawh a ni tawh a ni.