Aizawl; March ni 5 atanga neih tan Food Fest vawikhatna, Lammual a neih chu nimin tlai dar 6 khan khar a ni. He Food Fest hi mipuiin an hlutin tlawhtu an tam hle a. Dawr (stall) 29 hawn a ni a, Mizo kutchhuak ei leh in tur hrang hrangte phochhuah a ni. Dawr hrang hrangte hi nidang aiin Fest chhung hian an inhralh tha vek niin an sawi. Food Fest buatsaihtu, Industry department chuan kawng hrang hranga titha thlanna a nei nghal a. Best display (mipuite hip thiam ber) lawmman chu 3 L Health Foods (Proprietor Rodinga) in a dawng a, Best recognition award chu Aieng leh Sawhthing her rona khawl, Project Sekibuhchhuak siamchhuaktu HV Lalzuimawia hnenah pek a ni a, ei leh in sawngbawlna lama thianghlim ber (Most Hygenic award) chu Good Eats dawr neitu Lalrinthangi hnenah hlan a ni. Best Entrepreneur award (customer chhawn tha, themthiam, ngelnghet) chu JB Bakery neitu Laldamtiri hnenah hlan a ni bawk. Best Entrepreneur Award dawngtu Laldamtiri, Venghlui te hian midangte siam ve loh Norwegian roll, Norwegian wafers leh Chocolate te an siam a, hei hi Fest tlawhtute hian an duh hle niin an sawi.