Colombia ram chhung, Amazon ramngawa thlawhna tlaa tel naupang palite chu thla khat chuang zawn an nih hnuah dama hmuh a ni tih an ram president chuan a sawi.

Unau pali, kum 13, kua, li leh khat mi naute te hi an nu, thlawhna khalhtu leh a puitu te nen May khan an chesual.

An nu leh puitling dang chuang pahnih hi thlawhna tlaah hian an thi vek.

President Gustavo Petro chuan chawlhkar eng emaw zat zawn an nih hnua dama an hmu leh ta chu ‘ram pum tan hlimna’ a nih thu a sawi.

An hmuh ni chu ‘magical day’ tia sawiin, “Anmahni chauh an ni a, an dam khawchhuahna tura an beihna hi history-a chuang reng tawh tur a ni,” a ti.

Petro-a hian sipai leh ram luah hmasatu hnam zinga mi, ni 40 zet bo tawhte thlalak pawh a dah chhuak a ni.

Naupangte hi damdawi thiamten an enkawl zui mek a, an pu nen an inhmu tawh tih president hian a sawi bawk.

Cessna 206 thlawhnaah hian an nufa za hian Araracuara, Amazonas province atangin San José del Guaviare pana thlawkin an thlawhna khawl chiang lo vangin an tla ta a ni.

An tlakna hmunah hian puitling pathumte ruang hi sipaiten an hmu nghal mai a ni.

Civil aviation thuneitute chuan naupangte hi thlawhna tla keh darh atang hian tlanchhiain ramngaw chhah takah hian puitu an zawng zui ta niin Reuters news agency chuan a tar lang.

President hian thla hmasa khan hmuh an nih thu a lo sawi tawh a; mahse, a lo ni leh lo va, paih leh mah se dem a hlawh phah.

zawn hautak NAUPANG

Naupang palite hi May thla atang khan ngawrh taka zawn tan an ni a, zawngtute hian an hnuhma an hmu a, heng zingah hian naute tui in um te, sakawrbahcheh te, sam kilhna leh an tawmna ni awm tak te an hmu.

Hnuhma tlem an hmu zel a, hengte hian an dam ngei nia ngaihna a awm a, an tlakna hmun hi sakei (jaguar), rul leh sa ei chi rannung tam tak awmna a ni.

Naupangte hi Huitoto hnam an ni a, an hnampuite hian ramhnuaia chetla thang an ni a, theirah leh rama thil awm ringin an dam theih an beisei hle.

Ram leilung fate hian a zawn hna an thawhpui a, Huitoto tawnga naupangte pi thusawi chu helicopter atangin an zawn chhungin an tiri reng a, hei hian an hmuh theihna kawngah a pui nasa hle nia ngaih a ni.

Colombia president hian thla hmasa khan Twitter-ah hmuh an nih thu a tar lang zauh va; mahse, hmuh an lo la ni tak tak si lo va, paih leh nghal mah se demtu a ngah phah hle nghe nghe.