ZALEN September 6, 2026: Mizoram sawrkar, tlawmngai pawl leh kohhran hmalakna avangin Mizoramah ruihhlo a vân bakah a man a to phah a, hei vang hian chawhrualin ruihhlo ti thin mi 100 velin ni tin Assam-a ruihhlo awmna, Bagha an pan thin nia hriat a ni.

Central YMA hruaitute sawi danin ruihhlo tlana Mizoram thalaite Assam-ah an kal nasat avang hian Bagha vela homestay pawh a khat tha hle niin an sawi a. Heroin bakah hian thalai, a bikin naupang lamah ganja zuk a hluar hle nia sawiin ganja hi rel leh maxicab hmangin Mizoramah tawlh luh thin a ni tih an sawi bawk.

Tunlai hian heroin hi ni dang aiin a vâng a, a ti thinte pawhin ni dang angin an hmu zung zung thei lo a. Hei mai bakah a man pawh a to phah hle bawk a, ni danga heroin hawng khat Rs. 8,000/9,000 vel ni thin kha tunlai hian hawng khat Rs. 50,000 velah a kai nia thudawn a ni.

Health department hnuaia Food & Drugs Administration chuan August 5, 2026 thleng khan damdawi ruih theih kaihhnawihah drugs license 12 an cancel tawh bakah suspend mek 17 an nei bawk.

FDA hotute sawi danin damdawi license an cancel 12 zinga pariat chu tun hnaia tih a ni tih sawiin hengte hi damdawi zuar thang leh damdawi dawr pangngaite ni lovin lirtheia damdawi sem kual zingah a hluar niin an sawi a. Damdawi ruih theih ho chu dan hnuaiah khuahkhirh a ni tih sawiin retailer-ten bur 100 chin leh wholeseller-ten bur 1,000 chin an kawl thei niin an sawi bawk.