2020–21 NBA season kal meka playet hlu ber atana an thlan chhuah hlim, NBA Most Valuable Player Award dawngtu, Nikola Jokić hi February 19, 1995-a piang niin Serbian a ni a, tunah hian NBA franchise-a Denver Nuggets-ah a khel mek a, center tangkai tak a ni.

Sombor, Serbia-a piang, Jokic hi mut pindan pahnih awmna inah a u-te mipa pahnih bakah a nu leh pa, a pi nen an chengho thin a, mi hausa tak an ni lem bik lo.

A pa hi agricultural engineer an ni a, Jokić-a hian naupang te a nih lai atang tawhin basketball khelh hi a ngaina hle a, a u-te pahnih nen an khelho nasa thin.

An unaua upa ber, Strahinja pawh hi a thiam chho hle a, Europe-a chuan hriat hlawh tak niin a u pakhat zawk, Nemanja pawh University of Detroit Mercy-ah college basketball-ah a inkhel thin bawk.

An unau hi NBA player hlui, Darko Miličić nen pawh an inkawmngeih em em a ni.

Jokić hian basketball piah lamah chuan a naupan lai hian sakawr intlansiak hi a tui hle a, intihsiaknaah pawh a tel ve thin a, tun thleng pawhin a tuina ber pakhat a la ni reng.

A tuina dang lamah erawh a kal lo va, tunah chuan basketball player hlawhtling ber zinga mi a ni tawh a. NBA All-Star-ah vawi thum a lang tawh a, All-NBA Team-ah vawi hnih a lang tawh a, tum khat phei chu inkhel bul tantu zingah a tel a ni.

A hming lema ‘Joker’ an tih thin, Jokić-a hi Nuggets hian 2014 NBA draft round hnihnaah an thlang chhuak a. A season khatnaah pawh a che tha hle a, kum 2016 khan NBA All-Rookie First Team-ah a tel phak nghal a ni.

2018–19 NBA season khan Nuggets hi Western Conference Semifinals a thlenpui a, a vawi khat nan All-Star leh All-NBA First Team atan thlan a ni phak.

Season dawt lehah pawh che tha chhunzawmin All-Star leh All-NBA honor-ah a lang phak leh a, a team hi Western Conference Finals a thlenpui ta hial bawk.

Jokić-a hi NPA player zinga triple-double nei tam 10 zingah a tel phak tawh a, European player zinga NBA-a hetiang ngah ber hi a ni a, triple-double tlin rang ber record neitu niin minute 14 leh seconds 33-ah a tlin hman).

Ram tan pawh a tangkai a, 2016 Rio Games-ah khan an ram chu Olympic silver medal a lakpui.