Aizawl: Mizoram ah Covid 19 hripui leng vangin lirthei punna a tlahniam nasa hle a, hri len hma kum 2019-20 a lirthei punna zat, hrilen hnu 2020-21 in a phak lohna chu 5,953 a tling.

Transport department hotute hnen atanga ZALEN thudawn danin, Covid 19 hripui len hma 2019-20 chhung khan Mizoramah lirthei 31,769 a awm thar a, chung zing a a tam ber 22,011 chu DTO Aizawl hnuaia mi a ni.

Covid 19 hripui len hnu 2020-21 chhungin lirthei 25,816 a awm thar a, lirthei punna in 2019-20 a phak lohna chu 5,953 a tling. DTO Champhai tih loh DTO dang zawng ah lirthei punna in 2019-20 a phak lo vek. Transport department thawktute chuan hrilen hnu a lirthei pung zat tlem ta chu Covid 19 vang ah a puh loh theih loh tih an sawi.

Transport department chhinchhiah danin, tun dinhmun ah Mizoram a lirthei awm zawng zawng zat chu 2,96,715 niin, chung zingah 2,07,499 chu DTO Aizawl a awm niin, DTO 8 zing ah lirthei tamna ber a ni a, DTO Mamit ah lirthei 5,568 awmin lirthei awm tlemna ber a ni bawk a ni.