ZALEN, September 04, 2026: Tun hnaia ruah sur nasa avanga Katakhal leh Bairabi inkara lei che avangin Guwahati leh Sairang inkara rel chu Inrinni atanga Nilaini thleng a zin dawn rih lo.

Northeast Frontier Railways (NFR) chuan Zirtawpni tlai khan rel zin tur thulh hriattirna leh Sairang leh India khawpui dang inkalpawhna rel tlan dan tihdanglamna a tichhuak.

Train No. 15610 (Sairang - Guwahati) Express chu Inrinni, Thawhtanni leh Nilainia zin chhuak tur ni mah se thulh a ni a. Hetih lai hian Pathianni leh Thawhlehnia Sairang atanga chhuak tur pawh relin Mizoram a thlen theih rih loh avangin Hailakandi atangin a chhuak zawk dawn tih an sawi.

Train No. 15609 (Guwahati - Sairang) Express chu Pathianni leh Thawhlehniah a zin dawn lo va. Inrinni, Thawhtanni leh Nilainia zin tur pawh Hailakandi thleng chauh a kal bawk ang.

Sairang leh Guwahati inkar rel bakah hian Kolkata thleng kal tur rel, Train No. 13126 (Sairang - Kolkata) Express pawh Thawhtanniaa Sairanga chhuak tura tih ni mah se Hailakandi atanga chhuak tura tih a ni bawk.

Pathiannia Anand Vihar Terminal, Delhi atanga Sairang kal tur Train No, 20508 pawh Hailakandi thleng chauh a kal dawn bawk a ni.

NFR-in hriattirna a tihchhuahah hian Ningania ruah sur nasa khan Katakhal leh Bairabi inkarah lei chein rel kawng atanga metre 70 huam chin vel a ni a, a kawng tak (track) huam chin metre 40 vel a chhe bawk niin an tar lang.

Rel a kal leh thuai theih nana hma lak ni mah se lei a chetna lai hi kawngpuiin a pawh lohna hmun a ni a, duh ang tawka chaka thawh theih a ni lo tih an tar lang.