Aizawl: Sawrkar laipui chuan chhiah lak dan thar Goods & Services Tax (GST) chu Parliament-a Central Hall ah hawngin nimin July ni 1,2017 atangin ram pumah hman tan a ni ta. GST hawnna inkhawmah hian Prime Minister Narendra Modi chuan thusawiin chhiah lak dan thar GST chu thil tha si, mawlmang bawk si a nih thu a sawi a. GST siam thar anih theih nan mi tam takin tha an thawh tih sawiin, "He hlawhtlinna hi party khat hnathawh vang a ni lo a, sawrkar mal hnathawh bik pawh a ni lo a, mi tam tak thawhrim rah a ni, " tiin a sawi. Finance Minister Arun Jaitley pawhin GST chu India ram history ah economy siamthatna lian ber te zinga mi a ni dawn tih sawiin, "Hnam pakhat tan tax pakhat leh market pakhat a siam dawn a, India in bung thar a kai dawn a ni" tiin a sawi bawk. Commissioner of Taxes, LH Rosanga chuan Zalen zawhna chhangin GST chu nimin dar 12:00 am a hawn a nih chiah a\ang khan hman tan a ni ve tih sawiin, "A hmain VAT dealer te chu migration chauh tihsak an ni a, hawn a nih chiah atang hian GST registration a tih theih \an tawh a ni." tiin a sawi. Commissioner chuan Tax lak theihna bungrua zawng zawngah chuan GST in rate a ruahman angin lak a ni vek tawh dawn tih a sawi a. "Office lam pawh kan inhawng zau a, kan officer te pawhin zanlai pawh sawi lovin internet leh mobile phone hmang te in hna an thawk char char a ni." tiin a sawi a, a tul dan azirin office hour piah lam thleng pawhin Thawhtanni atang chuan an kal mai thei niin a sawi bawk. Mipuite chu lo chiai lo phawt tura a duh thu sawiin, "VAT hnuaia tax tam ber 13.5% ni thin kha GST ah chuan 28% a ni ta daih mai a, mipuite an lo thlaphang ang tih a hlauhawm a, thil man hi tunhnai maiah chuan a danglam dawrh dawrh lo ang a, mipuite tan engmah chiai na tur a awm rih lo," tiin Zalen a hrilh bawk. India ram zalen kum 1947 hnua tax reform lian ber Goods & Services Tax hian ram GDP chu zaa 2 in a tihpun belh dawn niin thudawnna chuan a tarlang a. Zanlaia hawnna inkhawm Parliament a neih hi India history ah a vawi li na a ni.