Aizawl March 16, 2024 : Nagaland Indigenous People Forum leh Zo Re-Unification (NIPF) Organization (ZORO) te chuan nimin thawhona thuthlung an ziah hnuah chanchinthar lakhawmtute an hmachhawn a, India sawrkarin Free Movement Regime (FMR) leh Border Fencing tih an tum chungchangah a tawp thleng do an tum thu an sawi.

Pawl pahnih te chuan FMR hi tihtawp a nih a, border fencing an tih bawk chuan Zo hnahthlak (Chin-Kuki-Mizo) India, Burma, Banglades leh Naga India leh Burma a cheng te chu thenhranin an awm dawn an ti a, hei hi an duh lo tak zet tih an sawi.

Heng te bakah hian Forest Conservation Act (FCA) 2003 hi hman a nih chuan nitin nunphung a buai vek dawn an ti a, hemi huamchhunga ram leh ramhnuai eizawnna nana hmang te tan harsatna nasa tak a thleng thei a ni an ti.

Pawl pahnih te hian The Citizen Amemdment Act (CAA) chu FMR leh Border fencing te nena inkaihhnawih tlat a ni an ti a, British min awp hma atanga tihdan phung inang, la inkalpawh reng an nih avangin hei hi hman phi lovah an ngai a. India-in zalenna a hmuh hnu pawha la inkalpawh reng an nih thu an sawi.

Uniform Civil Code (UCC) pawh North East-a tribal te tan chuan thil hnawk tak a ni an ti a, hnam tih dan phung leh an rinna nen thil inkalh tlat a ni an ti.

Armed Force Special Power Act 1958 (AFSPA) pawh North East India a cheng te tan chuan hnawk tak a ni a, he thil hi hman a nih chuan nunphung pangngai a tidanglam vek dawn an ti a, India sawrkar hian hei hi a ngaihtuah that leh a tul a, he dan hi a rawng hle a ni, an ti bawk.