Mizo ten DJ kan that ber zinga mi DJ Kniquee (Nicky Chhakchhuak) chu North East-a DJ Festival lian berah a inlan dawn a, main event-ah a perform ang. DJ's Music  Festival hi hmarchhakah chuan DJ te tana festival lian leh ngaihven hlawh ber a ni mek a, kumin hian Meghalaya khawpui Shillong-ah neih niin, May 4 atang khan tan a ni a, May 21, 2022 hian a tiak ang. 
 
DJ Kniquee chuan, "DJ event lian berah play turin min rawn thlang hi ka lawm a, ka phur tawh tak zet a ni. Ka bultan dante ka ngaihtuahin ropui ka ti a, Pathian malsawmna vang liau liau a ni," tiin a sawi. DJ Kniquee hian kum 2000 chho atang khan DJ (Disc Jockey) hi a luhchilh tan a, a zin kawng a bumboh ve hle. Accident avangin wheelchair a hman zui a ngai a, 2004-a Vanlentine's Party-a DJ a nih tum phei chuan thut pawh a thu rei thei lo - mahse a beidawng mai lo a, tunah chuan North East-a DJ festival lian berah Main Event hial a chang ta a ni. 

DJ's Music Festival hi Shoutout Entertainment ten an buatsaih niin, anni hi Shillong-a hmunpui nei an ni. Festival an buatsaih bakah hian DJ zirna institution pawh an kalpui a, tunah hian hmarchhak state hrang hrangah an inzar pharh tan chho mek a ni.