12 Sept. 2023: 'Fashion Capital of The World' an tih zinga mi Milan, Italy-ah North East India Festival neih a ni a, Mizoram atanga tel designer Escape Engmawia a che tha hle. 

Festival hi Villa, Necchi Campiglio, Milan, Italy-ah neih a ni a, India leh Italy ten inlaichinna tha zawk an neih theihna tura buatsaih a ni. Mizoram atangin Escape Engmawia pawh thlan a nih angin a tel a, a che tha thawkhat hle a ni. 

Escape Engmawia chuan, "Pathian zarah mi ten ka show an hlut a, buyer hrang hrangte an lo kal nual. Kan thawmhnawte an en kual a, vanneih thlak takin ka collection siamte min ngaihhlut sak a, ka hralh nual bawk. Ka lawm khawp mai a, a chhan chu kawr pakhat pawh hi India rama kan hralhna let 6 vel zeta to ten kan hralh thei a ni. Italy-ah chuan tailoring piece hi an ngaihluin an dah sang em em a, kuta thui ngeite hi an ngaihlu hle a ni. Tin, website thenkhat ten in tie-up puiahte min sawm angin agreement-te kan siam a, Pathian zarah bung thar kan kai ngei ka ring," tiin a sawi.

Fashion Show-ah hian hmarchhak state pariat aiawh designer te an kutchhuak an pho lang a, Mizoram atanga kal Escape Engmawia pawh a che tha tha hle. Fashion Show-ah hian Milan Fashion Industry-a model tha ber ber bakah, hmarchhak atanga tel model te an inlan a ni. 

North East India Festival hi Consulate General of India Milan, Italy leh North East Institute of Fashion Technology, Guwahati (NEIFT) tangkawp ten an buatsaih niin, kumin hi a vawi 17-na a ni. India atangin - Ministry of DoNER, North Eastern Council, Ministry of Textiles, Meghalaya Tourism, Nagaland Tourism, Office of DC Handicrafts, KVIC, Oil India Ltd., NeDFi, NEHHDC, Silk Mark leh Indian Council For Cultural Relations (ICCR), ICCI. Mr. Rai Medhi te an tel bawk a ni.