Aizawl September 15, 2022 : Lunglei District Congress Committee chuan Education Minister Lalchhandama Ralte chu Baptist Higher Secondary School (BHSS) Administrative Building, Lunglei Serkawn-a mi sakna tur chheprel-ah an puh a, BCM hnenah September chhung ngeiin a sum chheprelh nia an sawi hi pe turin an phut. A chheprelhna an zawt bawk.

Lunglei Congress chuan Mizoram Sawrkar-in NABARD Loan hmanga Mizorama School engemawzah a sak zinga tel Baptist Higher Secondary School (BHSS) Administrative Building, Lunglei Serkawn-a sak mekah a sakna tur Rs Nuai 26 chu a bo niin an sawi.

LDCC chuan, Congress sawrkar lai khan School sak that tur zingah BHSS hi telh niin estimate Rs Nuai  80 ruahman a ni a, mahse MNF kaihhruai sawrkar thar a pian khan  Rs nuai 78 ah tla thla in contractor hnenah pek a ni, an ti. BCM chuan contractor kutah pek a nih chuan tha vak lo a sak an hlauh avangin Kohhran kutah dah turin Education Minister Lalchhandama hi an ngen, an ti a, mahse a hlawhtling lo niin an sawi. 

Lunglei Congress chuan, "Party worker te pawhin sa ve ngei se thil awmlo a ni hran lo. Mahse, Education Minister hian sum siam a tum tlat avangin Allied Consultancy firm hming hawhin anni hian party worker/contractor hnenah Rs nuai 52-a sa turin an ti a, Rs nuai 26 chu an chheprelh ta tihna a ni. Contractor hian Rs Nuai 15 hauhin Rs Nuai 37 in BCM hi Administrative block sak hna thawk turin hi hlan an tum a, mahse, BCM chuan hei hi a hnawl. Hnawl a nih hnuah Education Minister leh a naute hian Rs 42,4,688 in BCM chu sa mai turin an ti a, party worker/contractor te hnenah earthwork senso pe turin an ti thung. An share Rs nuai 26 chu an dahtha tlat a ni," an ti

Congress chuan, BCM hian Building sak hna chu a ko-ah an dah lo thei ta lo niin an sawi a, sawrkar pawisa in a daih bak chu Kohhran pawisa a chhunzawm turin an ti, niin an thuchhuah siamah an tarlang.

LDCC chuan BHSS Administrative Building hi September 2021 atang khan sak that tan a nih thu an sawi a, a tam zawk sak zawh tawh a ni, an ti. Estimate Rs Nuai 78 atangin Rs nuai 10 hi Contractor pek a ni a, Rs nuai 68 la awm atangin Rs Nuai 42 leh tlem (42, 46,088/-) BCM kutah hlan a ni. A bak Rs Nuai 26 hi Education Minister Lalchhandama Ralte chu a awmna a hre ngeiah an ring a, "Khawiah nge a chheprelh?" an ti a, zawhna an zawt.