ZALEN June 4, 2025 : Vawiin khan Chief Minister Lalduhoma hovin a office-ah Thenzawl Peace City Master Plan chungchang sawihona neih a ni a. K. Sapdanga, UD & PA Minister ; Khilli Ram Meena, Chief Secretary leh official pawimawh te an tel.

Chief Minister chuan, "Thenzawl-ah hian tuihna tha tak tak a awm nual a, furah phei chuan chenna in te a chim hial thin. Kan Master planah hian khaw lailia lui mawi tak, dil nalh tak leh a chhehvel ram mawi tak a awm ngei tur a ni a. Sawrkar hmunhma, nakin zela kan la chhawr tangkai tur kan ruahman a ngai bawk ang. Tlang rama plan city, mawi leh khualzin hip tak, chenna atana duhawm si - ruahman ngei kan tum dawn nia," a ti. 

Thenzawlah hian mihring singkhat vel tunah hian cheng anga ngaih a ni a. Ram 108 Sq km huam chhung velah plan hi siamin, urban area bik chu 82 Sq km ang vel tura chhut ni ta se; mipui bit zawng hi 100 persons per hectare a nih chuan mipui nuaih sawm vel chu thawl nuam takin an khawsak thei tur a ngaih a ni a. A tul anga tihlen chhoh zel theih a ni bawk ang.

Agency rintlak leh hmingtha ngei thlan tum tlat ni se an tih bakah sawrkar atanga peace city buaipuitu tur bik Special Purpose Vehicle pawh din a rel bawk.

Master Plan atan hian Ministry of Housing & Urban Affairs chuan Mizoram sawrkar hnenah Nuai sangkhat a rawn phalsak a, a bul tanna tur Nuai 100 chu an rawn release tawh a. Plan siamtu tur agency thlan fel hunah 25% an rawn release leh ang a, draft DPR submit hunah 35% rawn release in final submit hunah 30% an rawn pe chhuak leh dawn a ni.

Thenzawl Peace City hmalakna hi Aizawl khawpui tawt lutuk tihziaawmna leh Mizoramin khawpui changkang zawk a neih theihna tura Chief Minister Lalduhoma hmalakna a ni a. Mawhphurhna a lak tirh atangin Central sawrkar thuneitute vawi enge maw zat a sawipui tawh a. Tunah hian Master Plan siamna turin cheng vaibelchhe sawm an rawn phalsak ta a ni.