April 4, 2024; Aizawl Traffic Police ten number plate diklo vuah lirthei 200 dawn an man tawh a, dan ang thlap a High Security Registration Plate (HSRP) vuah vek turin lirthei neitute an ngen.

ZALEN thudawn danin, traffic police te hian kumin february ni 11 thleng khan number plate diklo vuah lirthei 161 an man a, tun dinhmun thleng chuan 200 dawn an man tawh tura ngaih a ni.

Thuchhuah an siama an lo tarlan tawh danin, tunlai hian lirthei ah HSRP vuah lova mahni duh ang anga lirthei number plate siam chawp leh a nih dan tur niloa hmang an awm nual tih an tarlang a, Two Wheeler leh LMV-ah te registration number plate te lutuk leh mahni duh dan dana siam hmang an awm niin an tarlang.

Lirthei ah hian HSRP vuah vek tura tih a ni tih tarlang bawkin, lirthei lei thar, registration number nei tawh si, Dealer atanga HSRP la chhuak si lo te pawhin Section 51 sub-section 4, the Central Motor Vehicle Rules, 1989-in Motor Registration Number len zawng (size) mumal tak a sawi (High Security Registration Plate-a number leh fonts tiat chiah) ang thlapin lirthei number an ziak tur a ni a, HSRP chhuah ve leh an thlak nghal tur a ni. Lirthei neitute kan lirthei number-te enfiaha dan ang taka siamtha zel turin an hriattir.