Aizawl: Tleirawl ten nun kawng dika hruai thei tur leh ruihtheih thil vanga harsatna tawk te pui thei tura an mi rin ber chu nu leh pa te an ni.

Tlawmngai pawl pakhat Society for HIV/AIDS and Lifeline Operation in Mizoram (SHALOM) in nikum 2019-2020 chhunga High school/Higher Secondary school 6 a zirlai naupang te ruihtheih thil leh mipat hmeichhiat hmansual chungchang an zirchianna Start free, stay free (Him la, him zel rawh) tih an zirchianna atanga a lan danin zirlai naupang te hian nun kawng dika hruai thei tur leh ruihtheih thil avanga harsatna te pui thei tura an mi rin ber chu nu leh pa te an ni tih tarlan a ni.

Dr. Chawnglungmuana, Chief Executive Officer, SHALOM chuan zirchianna (survey) hi school thlanbik 6 a naupang kum 14-19 inkarah an nei tih sawiin, "Kan theihtawpa scientific in survey hi kan nei a, dik lo pawh a awm mai thei a. Survey a kan tarlan te hi kan survey neih laia tleirawl te ngaihdan a ni a, hei hian tleirawl dang te ngaihdan pawh hril ve in kan ring a ni," a ti. Dr. Chawnglungmuana chuan zawhna an siam chhangtu tam ber chu kum 16-17 inkar an ni tiin, "Kan survey atanga a lan dan chuan ruihhlo lo tem chhin tawh te hi a tam ber chu soft drugs a ni a, ruihhlo ti thin te tih tanna (gate way) chu vaihlo a ni," a ti a. "Kum 14-18 inkarah nasa zawka invenna (prevention intervention) kan kalpui chuan ruihhlo a buai leh sex a inthlahdahna hi thui tak kan veng thei dawn a. HIV kai belh tur pawh tam tak kan veng thei dawn a ni," a ti bawk.

SHALOM in zirchianna an neih atanga a lan danin ruihhlo ti thin ten ruihhlo an tih chhan ber chu 'rilru lam harsatna vang' tih tarlan a ni a, hei hian a entir chu nakin lawkah chuan rilru lam harsatna (mental health problem) hi thalaite ah a la hluar dawn tihna a ni a. Drugs (heroin) pawh hmei-chhia ten an ti chhin ve nasa tawh tih tarlan a niin survey chhangtu zingah mipa leh hmeichhia nilo 'other gender' a indah mi 20 an awm tawh tih tarlan a ni bawk.