H.LALHMUNSIAMA
Nungchate thian
Khatla South, Aizawl
Ph.No 9402580112

A hmasa berin nang leh i chhungte nungchate aiawhin chibai ka buk a che. Aw le, kan Zoram hi Pathianin engkim mai hi a inbuktawk vekin a lo siam a; thing leh mau leh ram hmulte lui leh nungcha chi tinreng mai. Fanghmir atanga sai thlengin ecological balance hi a lo siam vek a, chu mai bakah nungcha chi hrang hrangten rimawi ropui tak mai hmangin siamtu Pathian an fak a, achhun azanin an hram reng a, chungte chuan hunbi min hriattir a, an hram ri music mawi tak hmangin kan thlai leh hnim hring tinrengte hi vitamin damdawi an lo hlan reng bawk a, hringfaten hla thu leh hla tihausatu leh thlamuanna te, khawhar min hnem a, lungleng hnemtute an lo nihziate hi mi tam ber hian kan lo ngaituah em em loh zawngte pawh a ni mai thei a, engpawh ni se Ecological balance han tih hian a funkim hle a, chunga langsar tlem han tar lang ta ila:-

1. Sakeite hi Pathianin an chaw tur ramsa chi hrang hrang leh sava lian deuh thenkhatte an chaw-ah an hman deuh ber an ni a, chutih lai chuan an chaw ber sakhi, sazuk, saza leh sava liante pawh kan pipute hun atanga ecological balance awmzia ngaihtuah miah lova ramsa leh savate an sa tuina ringawt ngaihtuahna leh kan nun uluk loh avangin mi thenkhatten ralthuam chi hrang hrang - silai, tûr, thang chi hrang hrang nen kan ram nungcha hlu tak takte kan lo bei nasa em em a, chu chuan ecological balance heti zawng hian a tichhe thin a ni. Sakhi, sazuk leh a dangte hi sakeite tan chuan an chaw a ni tlat mai si a; mahse, kan lo chuh rêmpui nasat em avangin mihring ran vulh lamah an rawn tuan ve fo thin a ni, chu chu a tuartu chu ran vulh neitu, sapel ve ngai lote an ni thei bawk a, an ni lo thei bawk a ni. Chutiang bawkin Pathianin sakeite chu kan thlai ramsa tam takte atanga kan tawrh theih min vensaktu atana min pekte an ni ve leh a, sakeite kan tihrem chuan sanghal leh sakuh leh a dangte lakah kan thlai lamin a lo tuar vel leh si a, a tuartu ber chu mihring kan ni leh zel bawk si.
2. Keini Zofaten kan thlahtu Evil leh Adama te thlemtua ngaiin rul hi kan haw em em thin a, a tam zawk phei hi chuan kan hmuh phaka awm tawh phawt chu thah zel kan tum mai zel a, a that theite chuan kan that hmiah hmiah zel mai a, hengte hian a lehlamah sazu, laitel, laiking leh a dangte an lo puang a, kan thlai bawkin a tuar leh thin a, Pathianin rulte hi min tina tur ringawtin a siam lo va, kan tan tangkai taka a siam vek an lo ni tih hi i hre thar zel ang u. Rulte hian mihring hi apawng takin mi an chuk ngai lo a ni.
3. Mu lam chi kan tih rem chuan thlai leh ramar te, thuro te, pit leh vasuih te, vaki te an lo puang ve leh a. Chungte pawh chu kan thlaite venghimtu an lo ni leh tehreng mai a, chumai bakah rul tam lutuk tur ei rêmtu an lo ni ve leh bawk a ni. Chutiang bawkin chhimbuk leh tahngai te, tuitu te, hrangkir te pawh hi kan hriat loh hlan hian min vengtute leh hunbi min hriattirtu pawimawh tak an lo ni reng mai.
4. Sava chi hrang hrangte hi kan tan an lo hlutzia chu kan hriat phak bak a ni ang. Kan thlai chi hrang hrang leh thing leh mau te ramhmul tinreng te, nget leh pangang leh khau lam chi atanga tawrhna laka min vengtute an lo ni vek a ni. Vamurte hi kan buh hrikte ei faitu an ni a, hengah hian rannung lakah min vengtute an lo ni reng si.
   Kan ram nungchate heti taka kan tana hlu leh tangkaite an hlutna leh tangkainate ngaihtuah miah lova silai tha chi hrang hrang leh tûr leh thang chi hrang hrang te, sairawkherhte hmanga kan ram mawi tak a chhunga chengten nungcha hlu tak tak ralpui beiha kan bei hi ngaihtuah chianga Pathianin a duh dan leh a siam chhan ang taka nungchate chunga kan rilru put hmang hi insiam that a hun tawh hle a ni.
   Tun atang chuan kan ram nungcha te hmang a sumdawnna te, nawmsip bawlna ang ziazanga kan ralthuam hman vak vak te, nungcha thahna hmanrua chi hrang hrang hmante hi bânsan a kan ram riangte hi nunrawng taka hmangaihna tel lova kan lo chet fonate hi ngaihtuah chianga Pathian ringtu kan nihna ang taka kan ram nungcha hlu tak takte hi hmangaihna leh thinlung thianghlim tak nen rilru thar thinlung thara kan ngaihtuahnate insiam tha turin i khawngaihna ka ngen takzet che a ni. Thilsiam zawng zawngte chuan Pathian fate lo lan hun chu nghakhlel takin an lo thlir reng che a ni. Rom 8:19-22 thu chuan min hrilh a ni. A tum ber chu:-
   1. Silai hmanga sava leh ramsa pel sim tura ngen.
   2. Thang chi hrang hrang leh sairawkherh leh silai leh a mu zuara ei zawnna bânsan.
   3. Tûr leh bawm, generator, dinamo hmanga lui lam nungchate thah loh.
      • Chhuan thar lo awm zel turten anchhia min lawh lohna turin nungchate hmangaihna nei theuh turin ka ngen che a ni.
      • Nungchate lo tlem tak avang hian kan economic lam thlengin a nghawng hle tawh a ni. Kan agriculture, kan thlai chi hrang hrang tawrhna hi a van nasa dawn em!!
      • Kan ramah rannung seh avanga thihna leh tawrhna tam berte hi kan Ecological Balance tichhia a, kan ram rohlu nungchate kan tihhlum nasat em vang a ni tih hi phat rual lohvin a dik a ni.
      • Kan ramah hian tur leh bawm, silai avanga pa leh fate leh nau, thian leh thian inkahhlum/insaipalhna a tam tawhzia te bawm avanga mahni intihlum, ramtuileilova insiamna a tam tawhzia. Tûr hmanga nungcha thah leh an sa ei hian natna chi hrang hrang leh cancer thleng a a thlen theih zia hi Zofate hian engang takin tuar nasa ang imaw.
      Hei hi thu pe zawngin ka sawi lo va, kan ram Pathianin min pek zimte a chhunga cheng nungcha hlu tak takte hian Pathianin a siam chhan ang taka an hnate kan ram tana an thawh zela tisa leh thlarau malsawmna kan ramin a tak taka kan lo dawn zel theihna turin nungchate aiawhin kan Pathian hmingin ka ngen takzet che a ni e.
      Ka ngenna tlawm tak hi Pathian aw-ah min lo ngaihsak tur pawhin ka beisei bawk che a ni. Min zawmsak theih chuan ka lawm hle ang.