Hlaphuah thiam tak boral ta Dokamlova phuah 'Nunrawng hmeltha' tih chu Zualbawihi'n video a peih fel leh ta. He hla hi 2017 daih tawha a record kha niin, tih chhuah loha rei tak a awm hnuah Zualbawihi hian a rawn thar thawh leh ta a ni. 'Nunrawng hmeltha' tih hla hi Rka, 3 Brother's Recording Studio kutchhuak a ni a, videography hi Thatea kutchhuak a ni thung.

Zualbawihi chuan, "He hla hi nalh ka ti em em thin a, pa Dka dam lai khan amah pawh khan sa turin min ti fo. Mahse hun lo taka min boralsan tak hnuah ka record thei ta chauh erawh ka inthiamlo hle, amah ngei khan ngaithla ve hman se ka duh hle. Tunah chuan a duhthusam ang ngeiin ka pui tlin thei ta a, ka ngai hlu tak zet a ni," tiin a sawi. 

Pasal  aneih hnu pawhin cable Tv lamah hla thar dah vak lo mah se Zualbawihi hi a reh mai lo a, a khat tawkin ama YouTube channel lamah hla thar a upload ve reng. Pathian fakna hla leh hnamdang hla a cover a dah nasa a, zai chawlhsan mai ala tum lo bawk. 

Zualbawihi chuan, "Pathian zara ka dam phawt chuan zai hi chawlhsan ka tum lo a, hla thar neih belh zel ka duh a ni," tiin, zai chawlh san lam a rilruah a la lang lo. He tih rual hian a hla thar ngaithla duh tan chuan a YouTube channel lam vil ngun deuh a ngai thung dawn a ni.