Mizoram Nursery Owners Association chuan thlai tiak supply chungchangah Horticulture Department officer thenkhat te chuan hleih nei takin thil an ti thin niin an puh a, officer te chuan thurualpui neiin firm an siama chumi hmang chuan thlai chi vaibelchhe tel tak meuh an supply niin an sawi a. A taka hnathawk te chu hlamchhiah an ni niin media mite an hrilh bawk a ni. Tun thla 2/3 kalta lek chhung pawh khan hetiang thil tihah hian sum thahnem tak an hui niin an sawi bawk a ni. Tunah hian Mizoramah nursery nei mi 68 awmin a dam (valid) te chu 26 chauh an nih thu MNOA te hian an sawi bawk a ni. Thla khat liam ta khan Horticulture officer te’n hleih nei taka thil an ti nia sawiin mi thenkhat chuan Chief Minister hnenah an lo sawi tawh a, media lamah pawh darhzau taka chhuah a ni tawh nghe nghe a ni. CM pawhin tun hnai khan sawrkar officer zingah kuthnathawk an berh em em laia an mahni lo inhmakhua ang chi chu thil tih chiah a ngaih loh thu a sawi tawh a, mirethei te chanai laksaka mahni inhaivur ching officer te chungah sawrkar thikthu a chhiat thu a sawi bawk a ni. Tun sawrkar hian mi retheite leh a taka hnathawkte khaihchhuah a tum hle a, hemi atan hian sum tam tak a dah hrang a. Ei leh bara Mizoramin hma kan sawn theih beiseiin tunah pawh hian economic development policy thar duan chhuah niin department tam takah hmalak mek a ni a. Hetiang sawrkarin tan a lak laia a hnathawkte ber an fihlim lo fo a nih chuan sawrkar pawhin a chhuizuia thil dik lo titute chungah hremna a lekkawh pawh a tul dawn a, hmalakna hmasaa dah ngei chi a ni ang. Horticulture officer thenkhatte puh an nih chungchangah hian nursery siamtute hian an tanna a dik zia tilang turin document nei tha hlein an insawi a, thudik a lan theih nan chuan theihtawp chhuaha tangin a tawp rak thlen an tum thu an sawi tawh a ni. Department lam hian nursery neitute puhna hi fumfe takin vawiin thlengin an la chhanglet lo bawk a ni. Horticulture officer thenkhatin hleih nei taka thil tiin mi dang chanai an hlawkna tura an lo hup a nih phei chuan thil dik lo lian tak a ni a, a awm tawh lohna turin hmalak hi a awm hliah hliah a ni. Kan ramah hian sawrkarin a chhawr officer thenkhat sangha dil nei tha tak tak, kuthnathawktute aia huan nei changtlung zawk an awm nual nia sawi thin a ni a, heng mite hian anmahni sumpaia hma an la a nih chuan ngaihthiam dante pawh a la awm thei a. Chutiang ni lova kuthnathawkte emaw, mi dang chan tur chhuha hetiang anga hma an lo la a nih chuan dem tur an ni khawp ang.