Aizawl March 23, 2024 : Lok Sabha inthlanpuia Mizoram tana Expenditure Observer Arvind Sharma chuan Zirtawpni tlai dar 6 khan Mizoram chhunga bank hrang hrang aiawhte Aizawl DC Conference Hall-ah kawmin inthlan hun chhunga an bank theuha sum chevel vil uluk turin a chah.

Inthlan chhung hian candidate-te leh mipui bank account-a sum chevel rinhlelhawm, ‘suspicious activity’ awm thei ang chi chu report vek thin turin bank zawng zawng a beisei a. Hei hian bank account, cheng nuai khat aia tam lakchhuah emaw, dahluh (a hma thla hnih chhunga chutiang transaction la awm ngai lo) te, RTGS kaltlanga bank account pakhat atanga district / constituency khata mi tam tak account-a sum thawn chhuah (a hmaa chutiang ang sum inthawn chhuah la awm ngai si lo) te, candidate emaw, a affidavit-a a tar lana kawppui emaw, amaha innghat/chenpui (dependent)-te emaw account-a cheng nuai khat aia tam thun luh leh lakchhuah te, election hun chhunga political party account-a sum lut leh chhuak, cheng nuai 1 aia tam leh voter-te thamna ni thei awm anga lang cash transaction rinhlehawm dang reng reng a huam a ni.

Expenditure Observer Arvind Sharma chuan inthlanpui thianghlim leh felfai nei tura bank thawktute an pawimawh thu sawiin, Election Commission of India (ECI)-in a beisei anga he ‘suspicious activity’ chungchang hi ni tin report pe thin turin a hrilh a. Nikum MLA inthlanpui-a state pakhat-a cVIGIL app hmanga sum thahnem tak man chhuah anih dan te sawiin, cVIGIL app chu a tul anga hmang tangkai turin a chah bawk.