Mizorama kohhran hrang hrangte inzawmkhawmna tur pawl, Church Council of Mizoram (CCM) chu October 27, 2024-ah din a ni dawn ta.

Thawhlehni khan J.M. Lloyd Hall, Synod Office-ah CCM dinna turin joint committee chu an thukhawm leh a, hetah hian din hun tur leh hruaitu turte an ruahman a ni.

Rev. R. Vanlalnghaka, Synod Moderator kaihhruaia thutkhawmah hian CCM din hun atana rawtna awm chu an pawm a. Hruaitu chanvo insiam remna te, kohhran tinin office bearer tura an ruatte chu pawmin October 26, 2024-a CCM Rorel Inkhawmah pawmpui tura chhawp chhuah leh turin an ti.

CCM a din theih nan tur hian joint meeting hmasa ber chu January 24, 2023 khan BCM Headquarters-ah neih a ni a, drafting committee an din a. He committee-in ruahmanna an siam chu May 19, 2023-ah Booth Manson Hall, Salvation Army Headquarters-ah en hova pawmin mahni kohhran rorelna sang ber theuhva ngaihtuah tura an tih hnuah April 3, 2024 khan JM Lloyd Hall-ah joint meeting hi an thu leh.

Joint meeting chuan CCM danpui duang tur leh din hun leh programme duang turin drafting committee chu ti lehin ruahmanna an siam chu tun tum thutkhawmah hian pawm a ni ta a ni.

CCM hruaitu atana ruatte:

President   -   Rev. R. Lalbiakliana, (BCM)

Vice Presidents   -   Rev. B. Zazawna (LIKBK) & Rev. Lalrodinpuia L.S. Nghaling (IKK Bualpui Ng)

General Secretary (Full time)   -   Rev. Dr. Lalhmangaiha (MPC)

Joint Secretary   -   Rev. T. Salaw (ECM)

Treasurer   -   Upa R. Lalmalsawma (MPC)

Finance Secretary   -   Rev. Jessai L. Neitham (EFCI)