India khawchhak lam, Odisha-a rel insu-a thi chu mi 288 an tling tawh a, mi 850 chuangin hliam an tuar bawk tih thuneituten an sawi.

Balasore district-a chhiatna thlengah hian ambulance pawh 280 chuang tirh luh an ni tih state Chief Secretary Pradeep Jena chuan a sawi.

Zirtawni tlim hlimah khan mihring phur rel chuan a kawng zuah sual palhin a tlu a, a bul chiaha kawng pakhat danga a let chu rel dang kalin a su a ni.

Tun kum zabi kal meka India-a rel chetsualna rapthlak ber a ni a. Thuneitute chuan thi hi an la pun a rinawm tih an sawi bawk.

Indian Railways chuan rel pahnihte hi Coromandel Express leh Howrah Superfast Express niin an sawi.

Odisha Fire Services Director General Sudhanshu Sarangi chuan Inrinni zing thleng khan thi hi mi 288 an ni tawh tih a sawi.

Jena chuan a hmain doctor 100 chuang an tir lut tih a sawi bawk.

Prime Minister Narendra Modi chuan chhiatna thleng pawh a tih thu leh thi chhungte chu a rilru-ah an awm reng tih a sawi.

“Chhanchhuah hna thawh mek a ni a, puihna awm thei ang ang pawh inrin nghal a ni,” tiin Twitter-ah a tar lang.

Home Minister Amit Shah pawhin ‘pawi tak zet’ a tih thu a sawi.

Dam chhuak mipa pakhat chuan, “Mi 10 atanga 15 velin min rawn delh nghal a, a mawng berah ka awm a. Ka kut leh ka nghawng a na em em a, ka inhai chhuah chuan thenkhatin an ke, an kut an lo chân tih ka hmu ta a ni,” tiin ANI news agency a hrilh.

State sorkar chuan thite sunna ni a puang tawh.

Shalimar-Chennai Coromandel Express rel zawk hi Zirtawpnizan dar 7:00 pelh hretah a tlu nia hriat a ni a, a bul chiaha kawng dang awmah a let.

A tlukna kawngah hian Yesvantpur atanga  Howrah pan, Howrah Superfast Express tlanin a su ta chiam a ni.

Thuneitute chuan bungraw phur rel dang pakhat, a bul hnaia lo ding pawh hnawl tel a ni tih an sawi a, an sawi chiang lo thung.

Dam chhuak thenkhat chuan rel leta tangte chhanchhuah hna an thawhpui nghal a. Tual chhunga bus company-te pawhin hliamte phurh nan an bus an thawh bawk.

A thlen chhan chhui phawt dawn

Railway Minister Ashwini Vaishnaw-a chuan Zirtawpni zan vek khan chhiatna thlenna hmun hi a pan nghal a, Inrinni tukah khan committee sangin a chhan leh a thlen dan an chhui tur thu a sawi a, chutah chuan a hriat chauh dawn tih a sawi.

Railway Safety Commissioner kahhruaina hnuaiah chhui hna hi thawh a ni dawn tih a sawi bawk.

Fimkhur lohna avanga thleng a ni thei em tih zawhna chu, “Engmah sawi theih a la awm lo, chhui zawhah a ngai,” a ti.

Vaishnaw hian tuna sorkarin a rilruk ber chu chhanchhuah hna thawh leh hliam tuarte enkawl a ni rih tih a sawi a. “Railways, National Disaster Response Force, State Disaster Response Force team leh state sorkarin nizan khan hna an thawk char char a ni,” tiin minister hian a sawi.

Rel chesual avanga eptuten bâng tura an tih chungchangah Vaishnaw chuan, “Tuna ngaihtuahnaa awm chhun chu chhanchhuah hna thawh leh puihna chauh a la ni rih,” tiin chutiang lam a ngaihtuah hman rih lo niin a sawi.

Vaishnaw hi IAS officer a nih hlim khan a hna thawh hmasak ber chu chetsualna thlenna, Balasore-ah hian district collector-in a awm a. Thil chhia siam that hna chu  district thuneituten tih tur an peih felah an tan nghal dawn tih a sawi.