~ Zodintluanga Ralte, Ex-Minister

Sorkar tha, sorkar chak, mipuite ngheng sorkar leh hmasawnna ruahmanna tha sorkar nei tura pawimawh hmasa ber chu Officer-te nena thawhhona tha neiha thawhpui thiama hmanthiam hi a ni thei ngei ang. Minister chuan a Officer-te inpawh takin ruahmanna a siampui a ngai a, phur leh thatho taka an thawh theih nan a kilkawi a ngai niin a lang.

Officer-te ruahmanna siampuia anni'n chak taka hna an thawh avanga khawpui danglamna leh hmasawnna chhinchhiah tlak lo thleng tawhte tlem thailang ang.

1. MOBILE GARBAGE TRAILER

Ka hriat chian ka hun laia thleng a ziak loh theih lo a, tam takin kan la mitthla theih tur chu Aizawl khawpui laili taka Mobile Garbage Trailer awm thin kha a ni awm e. Bawlhhlawh paihna hnuh chi kha khawpui laili takah kan hung fer fur a, bawlhhlawh a vum ther thur. Khualzin leh mipui vei vak tana hrehawm khawpin a rimchhia a ni.

Thenkhat chuan Treasury Square-a awmte kha in la mitthla theiin a rinawm a. Bawlhhlawh kha a liam deuh pur a, kawng kal tana hrehawm tak, khawpui laili titawp­tu a nih kha.

Minister ka nih ve lai khan khatih laia UD&PA Director Pu P. Lalchhuanga-te nen meeting kan nei a, ngaihtuahna thar neih a ngaihzia ka sawipui a. Hun rei lo te chhungin tuna kan hman tak zel bawlhhlawh paih dan 'system' tha tak mai Public Private Partnership Mode (PPP Mode) hi duan chhuah a ni a. Mipuiin pawisa thawh vein sorkar nena tangkawpin veng pali (4) - Mission Veng, Tuikual South, Dawrpui leh Chanmari te nen bul tan a ni ta a.

Veng dangah chhunzawm a ni ta zel a ni. Khatih lai kha chuan zingkarah traffic jam siam lovin kan zo vek a, tuna chhunahte Bawhhlawh paih motor an tlan ta zel hi chu siamthat ngai tak niin a lang. Kan kawrte a lo fai a, mipui kan awlsam phah bawk.

2. OXIDATION POND

Aizawlah Septic tank siam dan a fuh tawk lo nge ni, ek paih motor a tam em ema lui kawrhahte an paiha a fuh lo hle a nih kha. Kha harsatna kha harsatna mai a ni lo a, khawpuia chengte hriselna atan pawh thil tha lo tak a tling awm asin!

UD&PA leh PHED Officer-te meeting ka neihpui vat a, Er. Helen Rodingliani, PHED chuan Germany-ah he harsatna sutkian dan leh sawngbawl dan Oxidation Pond an siam thu a sawi a. Ek paihna mai bakah leitha siamna a ni tel tihte hriat a ni bawm. Hemi hi ti thei turin PHED leh UD&PA Officer-ten Project rang takin an rawn duang a, thla khatah an duang zo. Ek paih motor a bo zo ta ni mai lovin a then chuan leitha sumdawnna atan an hmang ta hial. Pu F. Lalnienga, Republic Veng leh mimal thenkhatin he leitha hi sumdawnna atan an hmang ta.

3. ROAD SIGNAGE

Ram changkang zawkah chuan khawpui chhungah kan kal duhna kawhhmuhtu a hringa tar Road Signage Board kan hmu thin. Hetiang hi kan mamawh ve tawh hle awm e. UD&PA Officer-te nen sawihona kan nei a, thla hnih chhung lekin project peih fel vek a ni.

Pu Sangmama, Government Secretary leh UD&PA Directorate engineer ta hmalak nghalna hi a fakawm a, a phunna tur Veng hming engkim an ruahman nghal zung zung a ni. Hun rei lo te chhungin Road Signage Board chu kan khawpui Aizawl, Champhai, Lunglei leh Kolasib-ahte kan nei ta mai a ni.

4. GAWSS PHASE-III

Aizawl khawpui tuilak pakhatna leh pahnihna Greater Aizawl Water Supply Scheme Phase - I & II-te hi tha mar reng mah se, khawpui a chawm zo tawh lo a ni ber mai. Ni khata a tui pump theih tam zat chu Litre Maktaduai 27 (27 MLD) te a ni deuh mai si a. Hei vang hian a pahnih inbelhkhawm aia lian 37 MLD Phase - III ruahmanna neih ngei a tul tih hi a lang reng tawh a.

State Investment Project Management and Implementation Unit (SIPMIU) Officer Er. Valbuanga-te nen meeting neiin ngaihtuah a ni a. Asian Development Bank (ADB) atangin State tinin kan dawn First Phase kan dawn chu kan Engineer ten a hunah an zo a. State dangte erawhin an zo thei lo thung. Hei vang hian ADB lamin State dang hnena 'Commitment' a pek tawhte chu kan thawh that vangin kan hmuh phah ta a, Aizawl tui lak pathumna GAWSS Phase-III kan neih theih phah ta hlauh a ni. ADB loan-ah hian Mizoram sum pakhat mah a sen a ngai lo a ni.

TLANGKAWMNA

Minister ka nih ve kum 10 chhunga Officer-te nena kan thawhhona hi rawn thlur bik ka nihna chhan chu ka hriat chian leh bel ber a nih vang a ni a. Officer hming ka rawn lamrikte phenah hian Officer dang thahnem tak an awm. Mizorama kan Officer-te hi India State dang Officer-te nena khaikhinin kan nep lo, ni mai lovin, kan thaa kan thiam bawk. Sports & Youth Services leh MSSC Officer te pawh sawi tur tamtak a awm a ni.

Kan Officer-te hian thil tha leh thil thar, ruahmanna tha leh hmasawnna an duh. Mah sela, Sorkarna chelhtu Minister-te berin kan tih thiam a ngai tih hi sawilan ve hrim hrim ka duh a ni.