Ola Electric Chief Executive Officer (CEO) Bhavish Aggarwal chuan mipuite ngahhleh em em Ola electric scooter chu August 15, Independence Day-ah tlangzarh a nih tur thu a puang a, chan ngei tumin an inchuh nasa nghal hle. 

Hauh lawk theih a nih atanga darkar 24 chhung lekin mi nuai khat chhuangin hming an ziak hman a, India rama khawpui 1000 chuang zet atangin ngaihventu an awm a ni. 
Ola electric scooter hi tun lai thimna sang tak hmanga thuam a ni a, hei vang hian ngaihventu pawh an thahnem hle. He scooter hi India ramah siam a ni a, khawvel hmun hrang hrangah an thawn chhuak dawn a ni. Ola hian Tamil Nadu-ah lirthei ke hnih nei siamna hmunpui an nei a, he lai hmunah hian a siam hna hi ngawrh takin an kalpui mek a ni. 

Company lam hian kumin chhungin a siam hna thawkhatna zawh hman an tum a, maktaduai 2 vel siam an tum a ni. Nakkum lamah tam zawk siam chhuah tumin hma an la a, maktaduai 10 vel zet siam tumin ruahmanna an siam tih tarlan a ni. 
Ola Electric scooter hi rawng chi hrang duh thlan tur a tam viau dawn a, chi 10 zet an siam! A man hi cheng nuai khat vvel ni tura ngaih a ni a, electric hmang a nih dawn avangin hralh a kal viau dawn niin a lang. 
India rama khawpui 400-ah charging point hi nuai khat vel siam a ni dawn a, minute 10 lek chhungin km 75-a thui tlan theihna a charge hman tura ngaih a ni.