ZALEN, Au. 29, 2026: Ram 27 atanga player 166 fuan khawmna, 9th Lagos International Badminton Classics-ah Mizo shuttler H.Lalthazuala chuan mipa maltanah silver medal a vaw chhuak a. Lawmman ropui ber hlawh chhuak zo lo mah se final kalkawngah Olympian a hneh ngat a ni.

Nigeria khawpui, Logos-a Indoor Sports Hall, National Institute for Sports (NIS)-a Nilaini atanga inelnaah hian Inrinni khan Chanmari West, Aizawl tlangval hian final-ah academy-a a awmpui thin, Indian shuttler tho, Tankara Gnaa Dattu Talasila lakah 2-0 (9-21, 20-22)-a chak a tlawm a ni.

Thazuala hian gold medal hlawh chhuak zo lo mah se final a luhna kawngah chanchin chhinchhiah tlak a hnutchhiah a. Unseeded (rinkai ni pha lo) chungin semifinal-ah champion tura rinkai ber (top seed) leh sulhnu tam tak lo nei tawh, Olympic Games-ah pawh an ram tana vawi lo lo inlan tawh, Israeli shuttler Misha Zilberman chu 2-0 (21-12, 21-6)-in a hneh ngat a ni.

Thazuala hian a hmain Mizoram leh India tan kum bithliah inelnaah hnuhma hrawl tak tak a lo nei tawh thin a, kumin atanga puitling (senior mens singles)-ah ram aiawhin a khel tan chauh a ni.

Mizoram Basminton Association (MBA) chuan silver a hlawh chhuak thei hi a chhuang tak zet tih a sawi a, a kal zelna turah duhsakna a hlan bawk.

Thazuala hi TATA TRUSTS, NEIDA, Mizoram State Sports Council (MSSC) leh MBA thawhhona kaltlanga inzirna hmuna awm a ni.