DOWNLOAD OUR APP

Read latest news on your phone
app-store

Olympic-a hmeichhe footballer langsar 8

Aug 01, 2021

Olympic-a hmeichhe footballer langsar 8

 Tokyo 2020-a Olympic hmeichhe football tournament neih mekah hian team 12 tel a hmawr an bawk lek lek tawh a, team li chauh dam tawhin natuk hian semi final an khel dawn a, chawhnu dar 1:30 ah United State leh Canada intumin dar 4:30 ah Australia leh Sweden an intum thung ang. Olympic team-ah hian khawvel hmeichhe footballer lar chu an tel deuh vek tih ngam hial a ni. Olympic hmeichhe football hi Atlanta  1996 khan an khel tan ve chauh a ni. 

Hmeichhe footballer zingah hian thiam leh hmelthat vanga lar kawp an awm nawk a, chung zinga hming langsar zual 8 te chu an chanchin tlem nen in bih thuak dawn teh ang.

Lindsey Horan (United States) : Kum 2019-a FIFA Women’s World Cup vawi li-na U.S-in an chawi theih nan Horan-i hi an team tana thawhhlawk ber zing ami a ni. Rio 2016 Olympic quarterfinal-a Sweden laka an tlawm kha USA hmeichhe team-in Olympic Games-a an result chhiat ber tum an tawng a, hemi tum hian Horan pawh telin, a football zinkawnga hun hrehawm ber zinga mi a nih thu a sawi hial.      

Kum 27 mi Horan hi Colorado chhuak niin PSG-ah season li chhung a khelh hnuah US-a hmeichhe football league sang ber National Women's Soccer League (NWSL) a Portland Thorns tan a khel mek. 2018 NWSL MVP Horan hi Thorns tana midfielder pawimawh ber pakhat niin 2017 khan an championna tura goal pawimawh a khung. PSG tana a khelh lai 2012-2016 chhung khan match 58 khelin goal 46 a thun a, kum 2013 atangin ram tana khel tanin game 88-ah goal 28 a thun tawh a ni. 

Barbra Banda (Zambia): Tokyo 2020 hmeichhe football team zinga champion tura beisei kai phak lo Zambia hmatawng Barbra Banda hi, Chinese club Shanghai Shengli tana khel mek a ni. Kum 21 mi Banda hi an naupang hle naa an National team captain niin ram tan goal 22 a thun tawh a ni. 

Zambia hmatawng hian a club Shanghai Shengli tan goal 18 thun tawhin season liam ta khan Chinese Women’s Super League-ah top scorer a ni a, China lama a kal hma hian Spain club Logrono tan khel thinin game 28-ah goal 15 a thun a ni. 
"A vawi khat nana kan ram Olympic games-a kan tel thei hi kan ram mitin tan thil hlu leh lawmawm a ni. Mipa team pawh an la qualified theih lohnaah history siamin kan tel thei a, hei hikan ram  hmeichhiat te cho phurtu pawimawh a ni ngei ang," tiin Banda chuan a sawi. 

Zambia hian Brazil hneh lovin awngphah an tel tawh a ni.

Lauren Hemp (Great Britain): Kum 20 mi chauh ala ni a, a ram Great Britain aiawhin tum ruk chiah ala inlan bawk. Tun July ni 21-a Chile nena an intum kha Olympic Games-a a inlan vawi khatna a ni. 

Season liam ta khan inhliam vangin a inlan theilo reng a, kum tawp lamah inlan thei chauhin Manchester City tan game 15-ah inlan hmanin goal ruk chu a thun a, a thiante goal thun tur vawi riat a siam sak bawk. A teammate Ellen White chuan, "A khel hi a hmuhnawm  ang bawkin a kianga khelh pawh a nuam. Team tana danglamna thlen thei khawpa thiamna danglam bik nei a ni," tiin a fak. Zirtawpni khan quarter-final ah Australia hneh lovin 4-3 a tlawmin Olympic medal an beiseina a tawp.  

Megan Rapinoe (United States):  Kum 36 mi winger hi 2019 khan Best FIFA Women's player-ah thlan niin Ballon d'Or Feminin pawh a lo hum haw tawh a ni. United State national team ten 2012 Olympic, 2015 leh 2019 FIFA World Cup an chawi theih nan a tawh hlawk hle bawk. Tunlai hmeichhe footballer lar leh thiam ber zinga mi a ni. 

Zirtawpni khan Netherlands nen quarter-final khelin 2-2 in an draw a, penalty ah 4-2 a chakin semi-final an lut. Chakna goal hi Rapioe thun a ni nghe nghe.  

IWABUCHI Mana (Japan):  Tun nipui transfer hian Aston Villa atangin Arsenal lamah a lut a, Japanese attacker hi goal thuntu a nih rualin midang siamsaktu tha tak a ni tel bawk. 

Kum 10 liam taa Japanese team ten World Cup an chawi khan kum 28 mi Mana hi team-ah a tel tawh a, Olympic thlengtu ram an nih bawk vangin Iwabuchi hian Japan tana Olympic gold lak ngei a tun nain zirtawpni khan quarter-final ah Sweden lakah 3-1 in an tlawm hlauh thung. 2012 Olympic silver medal alo chawi ve tawh a ni. 

Sammantha Kerr (Australia): Australia innghahna Kerr hi a chak bakah ball a thiam a, goal a thun thei hle a, Chelsea tana khelin nikum khan game 22-ah goal 21 a thun a, WSL's top scorer a ni nghe nghe. 

Australia captain hi USA-a NWSL-ah goal khung tam ber a ni mek bawk. Nimin khan champion tura beisei Great Britain chu 4-3 in an hneh a, naktuk tlaiah Sweden nen an inhmachhawn ang. Kum 27 mi Kerr hi Aussie national team tan game 97 khel tawhin goal 47 a thun tawh a, continent hrang hrang pathuma golden boot dawng thei ngat a ni.   

Vivianne Miedema (Netherlands): Miedema hian 2017 khan Euro-ah a ram champion puiin France World Cup, 2019 khan Netherlands ramin final an lut theihna tura thawh hlawk ber pakhat a ni bawk. National team tan hian game 96 inlan tawhin goal 73 zet a thun thei. Kum 25-na hmang mek chauh ala nih vangin hun tha a la ngah hle a, Arsenal star hi season liam ta khan Football Writers Association's te chuan Footballer of the Year atan an thlang a ni. Niminpiah khan United State lakah tlawmin semi-final an lut phak ta lo a ni. 

Christine Sinclair (Canada) : Canadian striker Sinclair hi an national team coach, Bev Priestman aiin kum thum zetin a upa a, tunah hian kum 38-na a hmang mek a ni. International football-ah khawvel-a goal thun tam ber a ni mek a, game 299 khelhah goal 186 zet thun tawhin ahmei apa-in goal thun kawngah chhing zo an awm rih lo. London 2012 leh Rio 2016-a Canada team-in bronze medal a pet chhuah tuma thawh hlawk ber pakhat a ni. Nimin piah khan Brazil nu ho chu penalty-ah hnehin semi-final an lut. Naktuk chawhnu dar 1:30 hian United State nen final lut zawk tur zawngin an inkhel ang. 

Share now